ఎంఎంటీఎస్ సేవలకు నూతన దిశ !

హైదరాబాద్‌: నగరంలోని కోర్ అర్బన్ ప్రాంతాల్లో ప్రయాణికుల అవసరాలకు అనుగుణంగా ఎంఎంటీఎస్ సేవలను మెరుగుపరచాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. శాసన మండలి హాల్‌లో జరిగిన సమీక్షలో ఎంఎంటీఎస్‌లో సంవత్సరాలుగా ప్రయాణికుల సంఖ్య తగ్గుతున్న విషయంపై ఆయన ఆందోళన వ్యక్తం చేశారు.

కార్యాలయ సమయాల్లో రైళ్ల సంఖ్య పెంచడం, సమయపాలన కచ్చితంగా పాటించడం అవసరమని సీఎం పేర్కొన్నారు. స్టేషన్లకు సరైన రాకపోకలు లేకపోవడం దృష్ట్యా చివరి దశ కనెక్టివిటీ కోసం మినీ బస్సులు ఏర్పాటు చేసే అంశాన్ని పరిశీలించాలని సూచించారు. ప్రయాణికులకు అవసరమైన అన్ని వసతులు కల్పించడం ద్వారా వినియోగం పెరుగుతుందని తెలిపారు. అలాగే స్వీయ ఆదాయ వనరులు పెంచుకునే మార్గాలను అధ్యయనం చేసి నివేదిక ఇవ్వాలని అధికారులకు ఆదేశించారు.