హైదరాబాద్‌లో వరుస ఫైర్ ఆక్సిడెంట్స్

హైదరాబాద్ నగర శివారు ప్రాంతాల్లో వరుసగా జరుగుతున్న అగ్ని ప్రమాదాలు ప్రజల్లో భయాందోళనలు కలిగిస్తున్నాయి. జీడిమెట్ల మరియు దుండిగల్ ప్రాంతాల్లో జరిగిన రెండు పెద్ద అగ్ని ప్రమాదాల కారణంగా స్థానికులు భయంతో ఇళ్ల నుంచి బయటకు పరుగులు తీశారు.

జీడిమెట్ల పారిశ్రామిక ప్రాంతంలోని రాం రెడ్డి నగర్‌లో అక్రమంగా నిల్వ ఉంచిన రసాయన డబ్బాల గోదాంలో భారీ అగ్ని ప్రమాదం జరిగింది. మంటలు ఒక్కసారిగా చెలరేగి వేగంగా వ్యాపించాయి. రసాయన డబ్బాలు పెద్ద శబ్దాలతో పేలిపడి రోడ్లపైకి ఎగసిపడ్డాయి. దట్టమైన పొగతో ఆ ప్రాంతం మొత్తం కమ్ముకోవడంతో ప్రజలు బయటకు వెళ్లిపోయారు.

ఇంకా దుండిగల్ పరిధిలోని బహదూర్‌పల్లి గ్రీన్ హిల్స్ కాలనీలో ఉన్న అలంకరణ సామగ్రి గోదాంలో మరో అగ్ని ప్రమాదం జరిగింది. ప్లాస్టిక్ వస్తువులు ఎక్కువగా ఉండటంతో మంటలు వేగంగా వ్యాపించి పక్కనున్న ఇంటికి కూడా అంటుకున్నాయి. కాలనీ మొత్తం పొగతో నిండిపోవడంతో ప్రజలు శ్వాస తీసుకోవడంలో ఇబ్బంది పడ్డారు. అగ్నిమాపక సిబ్బంది సంఘటనా స్థలాలకు చేరుకుని మంటలను అదుపులోకి తీసుకురావడానికి ప్రయత్నిస్తున్నారు. పోలీసులు కేసులు నమోదు చేసి దర్యాప్తు ప్రారంభించారు.