పర్యావరణ రక్షణకు కొత్త దారి చూపిన స్వీడన్

అధికంగా పెరుగుతున్న దుస్తుల వ్యర్థ సమస్యను పరిష్కరించేందుకు స్వీడన్ ప్రభుత్వం వినూత్నమైన “దుస్తుల మార్పిడి విధానం”ను ప్రారంభించింది. అల్మారాలు, వార్డ్‌రోబ్‌లలో ఉపయోగించని దుస్తులు పేరుకుపోతూ, ప్రపంచవ్యాప్తంగా డంపింగ్ యార్డులు నిండిపోతున్న నేపథ్యంలో ఈ కొత్త విధానం తీసుకొచ్చారు. పాత దుస్తులను పరస్పరం మార్చుకునే ఈ కార్యక్రమం ప్రజల్లో మంచి స్పందన పొందుతూ, పర్యావరణ రక్షణకు దోహదం చేస్తోంది.

రాజధాని స్టాక్‌హోమ్ సహా దేశవ్యాప్తంగా జరిగిన ఈ కార్యక్రమాల్లో వేలాది మంది పాల్గొన్నారు. గత ఏడాది 1.40 లక్షల మంది పాల్గొని సుమారు 44,000 దుస్తులను మార్పిడి చేసుకున్నారు. స్వీడన్‌లో పాత దుస్తులు చెత్తలో వేయడాన్ని నిషేధించినప్పటికీ, రీసైక్లింగ్ కేంద్రాలు నిండిపోవడంతో మార్పిడి విధానానికి మళ్లింది. సగటున ప్రతి వ్యక్తి ఏడాదికి 25 దుస్తులు కొనుగోలు చేస్తున్నప్పటికీ వాటిలో ఎక్కువ భాగం ఉపయోగించబడడం లేదు. ఐక్యరాజ్య సమితి పర్యావరణ విభాగం ప్రకారం ఫ్యాషన్ పరిశ్రమ ప్రపంచ కర్బన ఉద్గారాల్లో సుమారు 10 శాతం వాటా కలిగి ఉండటం ఆందోళనకర విషయం.