వీకెండ్ మ్యాచ్‌ల్లో ఉత్కంఠ.. రికార్డులు బద్దలు కొట్టిన ఆటగాళ్లు

ఐపీల్ లో వీకెండ్ మ్యాచ్‌లు అభిమానులను ఉత్కంఠకు గురి చేశాయి. శనివారం జరిగిన రెండు మ్యాచ్‌లు చివరి ఓవర్ వరకు రసవత్తరంగా సాగాయి. ఈ మ్యాచ్‌లలో పలువురు ఆటగాళ్లు ప్రత్యేక ప్రదర్శనతో ఆకట్టుకున్నారు.

అభిషేక్ శర్మ చెన్నై సూపర్ కింగ్స్‌ పై సన్‌రైజర్స్ హైదరాబాద్ విజయంలో కీలక పాత్ర పోషించాడు. అతను కేవలం 22 బంతుల్లో 59 పరుగులు చేసి జట్టుకు విజయం అందించాడు. ముఖ్యంగా 15 బంతుల్లోనే అర్ధశతకం పూర్తి చేసి తన గత రికార్డును బద్దలు కొట్టాడు. గత సీజన్‌లో 16 బంతుల్లో హాఫ్ సెంచరీ చేసిన అతడు, ఇప్పుడు మరింత వేగంగా ఆ మార్కును చేరుకున్నాడు. ఐపీఎల్ చరిత్రలో ఇది మూడో వేగవంతమైన అర్ధశతకంగా నిలిచింది.

ఇక టిమ్ డేవిడ్ రాయల్ ఛాలెంజర్స్ బెంగళూరు తరఫున ఆడుతూ మరో మైలురాయిని చేరుకున్నాడు. దిల్లీ క్యాపిటల్స్‌తో మ్యాచ్‌లో 17 బంతుల్లో 26 పరుగులు చేసిన అతడు, ఐపీఎల్‌లో అత్యంత వేగంగా 1000 పరుగులు చేసిన రెండో బ్యాటర్‌గా నిలిచాడు. అతను 56 మ్యాచ్‌ల్లో 1,019 పరుగులు నమోదు చేసి, మంచి స్ట్రైక్‌రేట్‌తో రాణిస్తున్నాడు. మరోవైపు, కోల్‌కతా నైట్‌రైడర్స్‌ జట్టుకు శుభవార్త అందింది. గాయం కారణంగా కొంతకాలం దూరమైన యువ పేసర్ మతీశా పతిరన మళ్లీ జట్టులో చేరాడు. అతడి ఫిట్‌నెస్‌కు శ్రీలంక క్రికెట్ బోర్డు అనుమతి ఇచ్చింది. ఇవాళ రాజస్థాన్ రాయల్స్‌తో మ్యాచ్‌లో అతను ఆడే అవకాశముంది.