హైదరాబాద్‌లో ఆఫీస్ స్పేస్ కు ఫుల్ డిమాండ్, లీజు కు భారీ అమౌంట్ తో డీల్

అమెరికాకు చెందిన ఇన్సూరెన్స్ సంస్థ హార్ట్‌ఫోర్డ్ గ్లోబల్ సర్వీసెస్ ప్రైవేట్ లిమిటెడ్ హైదరాబాద్ గచ్చిబౌలి ఐటీ కారిడార్‌లోని కళ్యాణి ట్రైడెంట్ భవనంలో 1.59 లక్షల చదరపు అడుగుల ఆఫీస్ స్థలాన్ని ఐదు సంవత్సరాల పాటు లీజుకు తీసుకుంది. ఈ స్థలం 21, 22 అంతస్తుల్లో ఉండగా, ప్రతినెల రూ.92.28 లక్షల అద్దె చెల్లించనుంది. చదరపు అడుగుకు అద్దె సగటున రూ.58గా ఉంది. కంపెనీ రూ.5.53 కోట్ల సెక్యూరిటీ డిపాజిట్ చెల్లించడంతో పాటు, ప్రతి మూడు సంవత్సరాలకు 15 శాతం అద్దె పెంపు ఒప్పందంలో భాగంగా ఉంది.

ఈ లీజు ఒప్పందంలో భాగంగా హార్ట్‌ఫోర్డ్‌కు 213 కార్ పార్కింగ్ స్లాట్లు కేటాయించగా, ఒక్కో పార్కింగ్‌కు నెలకు రూ.3,500 అదనంగా చెల్లించాల్సి ఉంటుంది. ఈ డీల్ కోసం కంపెనీ రూ.14 లక్షల స్టాంప్ డ్యూటీ కూడా చెల్లించింది. 21వ అంతస్తు అద్దె ఈ ఏడాది మార్చి 1 నుంచి, 22వ అంతస్తు అద్దె సెప్టెంబర్ 1 నుంచి ప్రారంభం కానుంది.

ఇటీవలి కాలంలో హైదరాబాద్‌లో జరిగిన పలు పెద్ద ఆఫీస్ డీల్స్ చూస్తే, నగరం గ్లోబల్ కంపెనీలను ఆకర్షించడంలో బెంగళూరును మించుతున్నట్లు కనిపిస్తోంది. ఫేస్‌బుక్ ఇండియా, వీవర్క్ ఇండియా, జేపీ మోర్గాన్, జేఎల్‌ఎల్ వంటి ప్రముఖ సంస్థలు హైటెక్ సిటీ, మాదాపూర్, గండిపేట ప్రాంతాల్లో భారీ స్థాయిలో ఆఫీస్ స్థలాలను లీజుకు తీసుకున్నాయి. ఇది హైదరాబాద్ కమర్షియల్ రియల్ ఎస్టేట్ మార్కెట్ బలాన్ని, గ్లోబల్ కార్పొరేట్లలో నగరంపై పెరుగుతున్న నమ్మకాన్ని స్పష్టంగా చూపిస్తోంది.