శంషాబాద్ ఎయిర్‌పోర్టులో గంజాయి స్మగ్లింగ్ గుట్టురట్టు

హైదరాబాద్‌లోని శంషాబాద్ రాజీవ్ గాంధీ అంతర్జాతీయ విమానాశ్రయంలో అధికారులు భారీ మాదకద్రవ్యాల రవాణాను అడ్డుకున్నారు. హాంకాంగ్ నుంచి అక్రమంగా తీసుకొచ్చిన సుమారు రూ.7 కోట్ల విలువైన హైడ్రోఫోనిక్ గంజాయిని స్వాధీనం చేసుకున్నారు. అధికారుల సమాచారం ప్రకారం, హైదరాబాద్‌కు చెందిన దీపక్ జోస్‌కుట్టి వ్యక్తిగత పనుల నిమిత్తం హాంకాంగ్ వెళ్లి తిరుగు ప్రయాణంలో క్యాథే పసిఫిక్ విమానంలో హైదరాబాద్‌కు చేరుకున్నాడు.

అతని సామగ్రిని తనిఖీ చేసిన భద్రతా సిబ్బంది ఏడు కిలోల హైడ్రోఫోనిక్ గంజాయిని గుర్తించారు. వెంటనే అతడిని అదుపులోకి తీసుకుని కేసు నమోదు చేశారు. ఈ గంజాయి ఎక్కడి నుంచి వచ్చింది, దీని వెనుక మరెవరైనా ఉన్నారా అనే కోణాల్లో పోలీసులు, సంబంధిత అధికారులు దర్యాప్తు చేపట్టారు. ఈ ఘటన మాదకద్రవ్యాల అక్రమ రవాణాపై మరోసారి ఆందోళన వ్యక్తం చేస్తోంది.