భారత్‌లో గ్రీన్ డేటా సెంటర్ రాజధానిగా ఎదుగుతున్న ఆంధ్రప్రదేశ్

విశాఖలో జరుగుతున్న CII పార్ట్‌నర్‌షిప్ సమ్మిట్ 2025 ఇప్పటికే ఆంధ్రప్రదేశ్‌ను జాతీయ దృష్టిలో నిలిపింది. దాదాపు 400 కంపెనీల నుంచి ₹11 లక్షల కోట్ల పెట్టుబడి ఆఫర్లు, సుమారు 13 లక్షల ఉద్యోగావకాశాలు—ఈ ఈవెంట్‌ను భారీ విజయంగా నిలబెట్టాయి. ముఖ్యమంత్రి చంద్రబాబు నాయుడు, రాష్ట్రానికి ప్రతి మంచి అవకాశాన్ని తీసుకురావడానికి దూకుడుతో పనిచేస్తున్నారు.

ఇప్పుడు రాష్ట్రం కేవలం సాధారణ డేటా సెంటర్లతోనే కాకుండా, పర్యావరణానికి అనుకూలంగా గ్రీన్ ఎనర్జీతో నడిచే డిజిటల్ ఇన్‌ఫ్రాస్ట్రక్చర్ వైపు పెద్ద అడుగు వేస్తోంది. గూగుల్, ఆదాని, రిలయన్స్‌లలాంటి దిగ్గజ కంపెనీల పెట్టుబడులతో ఏపీ, దీర్ఘకాల వృద్ధిని లక్ష్యంగా పెట్టుకుంది.

ఈ దిశలో అత్యంత కీలకమైన అభివృద్ధి—బ్రూక్‌ఫీల్డ్ గ్రూప్‌తో ఆంధ్రప్రదేశ్ ప్రభుత్వం కుదుర్చుకున్న MoU. ఇది సాధారణ పెట్టుబడి మాత్రమే కాదు, భవిష్యత్తు డేటా సెంటర్లు ఎలా ఉండాలి అన్న దానికి మార్గం చూపే ఒప్పందం. ఈ భాగస్వామ్యంలో భాగంగా, బ్రూక్‌ఫీల్డ్ రాష్ట్రంలో 3 గిగావాట్ గ్రీన్ ఎనర్జీ ఆధారిత డేటా సెంటర్ నిర్మించనుంది ఇది భారత్‌లో ఇప్పటివరకు అతిపెద్ద గ్రీన్ డేటా సెంటర్.

ఇప్పటి వరకూ 1 GW సామర్థ్యంతో ఆదాని నిర్మించిన డేటా సెంటర్‌నే దేశంలో అతిపెద్దది. కానీ బ్రూక్‌ఫీల్డ్ పెట్టుబడితో ఈ సామర్థ్యం మూడింతలు పెరిగి, ఆంధ్రప్రదేశ్‌నే భారత గ్రీన్ డేటా సెంటర్ హబ్‌గా నిలబెట్టింది.

ప్రస్తుత డేటా సెంటర్లు ఎక్కువగా బొగ్గు మరియు నీటితో తయారైన విద్యుత్తుపైనే ఆధారపడతాయి. ఇవి పునరుత్పాదక శక్తికావు. కానీ బ్రూక్‌ఫీల్డ్, సస్టెయిన్‌బుల్, ఇన్నోవేటివ్, ఫ్యూచర్ రెడీ మోడళ్లతో డేటా సెంటర్లను నిర్మించడంలో ప్రపంచవ్యాప్తంగా పేరుపొందింది. ఈ పెట్టుబడి APను భారత సస్టెయినబుల్ టెక్ విప్లవం కేంద్రంగా నిలబెడుతోంది.

అదే కాదు, బ్రూక్‌ఫీల్డ్ ఒకే ప్రాజెక్టుతో ఆగడం లేదు. మొత్తం ₹1.06 లక్షల కోట్లు పెట్టుబడిగా మాడ్యూల్ తయారీ యూనిట్లు, సప్లై చైన్ సౌకర్యాలు, గ్రీన్ ఎనర్జీ ప్రాజెక్టులు, గ్లోబల్ కేపబిలిటీ సెంటర్లు, లాజిస్టిక్స్ హబ్‌లు, పోర్టులు, ఇండస్ట్రియల్ టౌన్‌షిప్‌లను అభివృద్ధి చేయాలని లక్ష్యంగా పెట్టుకుంది. ఇవి వేల సంఖ్యలో ఉద్యోగాలు, పెద్ద ఎత్తున ఆర్థిక వృద్ధి తీసుకురానున్నాయి.

మునుపు గూగుల్ డేటా సెంటర్‌పై సస్టెయినబిలిటీ ప్రశ్నలు లేవనెత్తిన ప్రతిపక్షాలకు, ఈ భారీ గ్రీన్ డేటా సెంటర్ పెట్టుబడితో చంద్రబాబు స్పష్టమైన సమాధానం ఇచ్చారు. డేటా సెంటర్ల భవిష్యత్తు ఏ దిశలో పయనిస్తుందో ఆయనకు పక్కా అవగాహన ఉన్నదని ఈ అభివృద్ధి నిరూపిస్తోంది.
ఇది వేగం, స్టోరేజ్ గురించి మాత్రమే కాదు సస్టెయినబిలిటీ, బాధ్యత, వృద్ధి గురించి కూడా.