ఇరాన్ నుంచి నగదు తరలింపు.. అమెరికా అడ్డుకట్టు

ఇరాన్ నుంచి ఇరాక్‌కు భారీ మొత్తంలో నగదు తరలిస్తున్న విమానాన్ని అమెరికా అడ్డుకున్నట్లు అంతర్జాతీయ మీడియాలో వార్తలు వెలువడుతున్నాయి. దాదాపు 500 మిలియన్ డాలర్ల విలువైన కరెన్సీతో వెళ్తున్న ఈ విమానాన్ని అమెరికా వైమానిక దళం అడ్డుకున్నట్లు సమాచారం. అయితే ఈ ఘటనపై ఇరాన్ ఇప్పటివరకు అధికారికంగా స్పందించలేదు.

ఇటీవల అమెరికా-ఇరాన్ మధ్య ఉద్రిక్తతలు పెరుగుతున్న నేపథ్యంలో, ఇరాక్‌లోని ఇరాన్ మద్దతుగల మిలిటెంట్ గుంపులకు ఆర్థిక సాయం అందిస్తున్నట్లు ఆరోపణలు వినిపిస్తున్నాయి. ఈ సాయంతో అక్కడి అమెరికా స్థావరాలపై దాడులు జరిగే అవకాశముందని అంతర్జాతీయ కథనాలు చెబుతున్నాయి. ఈ పరిస్థితుల్లోనే అమెరికా ఇరాక్‌కు ఇస్తున్న ఆర్థిక సహాయాన్ని కూడా నిలిపివేసినట్లు సమాచారం.

పశ్చిమాసియాలో నెలకొన్న ఉద్రిక్త పరిస్థితులు ఇరాక్‌కు మరింత ఇబ్బందులు కలిగిస్తున్నాయి. ఇరాన్, అమెరికా మధ్య జరుగుతున్న ఈ పరిణామాలు ఆ దేశానికి తలనొప్పిగా మారాయి. ఇరాక్ ప్రభుత్వం నేరుగా ఇరాన్‌కు మద్దతు ఇవ్వకపోయినా, అక్కడి మద్దతుదారుల చర్యలపై అమెరికా ఆందోళన వ్యక్తం చేస్తోంది. ఈ నేపథ్యంలో భద్రతా సహకారాన్ని కూడా నిలిపివేసినట్లు ఇరాక్ అధికార వర్గాలు తెలిపాయి.