పెళ్లి బంధంలోకి అడుగుపెట్టనున్న టీమిండియా స్పిన్నర్ కుల్‌దీప్ యాదవ్!

టీమిండియా స్పిన్నర్ కుల్‌దీప్ యాదవ్ త్వరలో వివాహ బంధంలోకి అడుగుపెట్టనున్నారు. టీ20 వరల్డ్ కప్ కారణంగా తన పెళ్లిని వాయిదా వేసుకున్న కుల్‌దీప్ యాదవ్ ఇప్పుడు తన చిన్ననాటి స్నేహితురాలు వన్షికతో మార్చి 14న ఉత్తరాఖండ్‌లోని ముస్సోరి రిసార్ట్‌లో వివాహం చేసుకోనున్నారు. ఈ వేడుకకు బీసీసీఐ అధికారులు, ప్రస్తుత మరియు మాజీ భారత క్రికెటర్లు హాజరయ్యే అవకాశం ఉందని సమాచారం.

కుల్‌దీప్ యాదవ్ మరియు వన్షిక నిశ్చితార్థం గత సంవత్సరం జూన్ 4న జరిగింది. అసలు ఈ పెళ్లి గత సంవత్సరం నవంబర్‌లో జరగాల్సి ఉన్నప్పటికీ టీ20 వరల్డ్ కప్ కారణంగా వాయిదా పడింది. కుల్‌దీప్ తండ్రి రామ్‌సింగ్ యాదవ్ ఇటీవల యోగి ఆదిత్యనాథ్ ను వ్యక్తిగతంగా కలిసి తన కుమారుడి వివాహానికి ఆహ్వానించారు. ఈ వివాహ రిసెప్షన్ మార్చి 17న లఖ్‌నవూలో ఘనంగా నిర్వహించనున్నారు.