బెంగాల్ రాజకీయాల్లో హాట్ టాపిక్‌గా మారిన అర్జున్ సింగ్ కేసులు

పశ్చిమ బెంగాల్ అసెంబ్లీ ఎన్నికల రెండో దశ పోలింగ్‌కు ముందు రాష్ట్రంలో ప్రచారం జోరుగా సాగుతోంది. అధికార తృణమూల్ కాంగ్రెస్‌తో పాటు భాజపా, కాంగ్రెస్ పార్టీ నేతలు విస్తృతంగా ప్రచార కార్యక్రమాలు నిర్వహిస్తూ ఓటర్లను ఆకట్టుకునే ప్రయత్నం చేస్తున్నారు. సుడిగాలి పర్యటనలు, సభలు, రోడ్ షోలతో రాజకీయ వాతావరణం వేడెక్కుతోంది.

ఈ నేపథ్యంలో భాజపా అభ్యర్థి అర్జున్ సింగ్ నామినేషన్‌కు సంబంధించిన ఆసక్తికర అంశం వెలుగులోకి వచ్చింది. ఉత్తర 24 పరగణాల జిల్లా నొవపాడా నియోజకవర్గం నుంచి పోటీ చేస్తున్న ఆయనపై మొత్తం 119 క్రిమినల్ కేసులు పెండింగ్‌లో ఉన్నట్లు నామినేషన్ అఫిడవిట్‌లో వెల్లడైంది. గత ఎన్నికల సమయంలో ఆయనపై 24 కేసులు మాత్రమే ఉండగా, ఈసారి ఆ సంఖ్య 119కు పెరగడం చర్చనీయాంశంగా మారింది.