గ్రీన్ ఎనర్జీ, ఏఐతో నవయుగం - ఏపీ సీఎం చంద్రబాబు

ముఖ్యమంత్రి చంద్రబాబు నాయుడు “బెస్ట్ రిఫార్మర్ ఆఫ్ ద ఇయర్–2025” అవార్డును ముంబైలో జరిగిన ప్రతిష్టాత్మక కార్యక్రమంలో అందుకున్నారు. కేంద్ర ఆర్థిక మంత్రి నిర్మలా సీతారామన్ చేతుల మీదుగా ఈ అవార్డును ఆయన స్వీకరించారు. ఈ సందర్భంగా ఆయన మాట్లాడుతూ, సంపద సృష్టికి సంస్కరణలే పునాది అని పేర్కొన్నారు. తన నాలుగున్నర దశాబ్దాల రాజకీయ ప్రయాణంలో సంస్కరణల ముందు, తర్వాత భారత అభివృద్ధిని దగ్గరగా అధ్యయనం చేసినట్లు తెలిపారు. ప్రధాని నరేంద్ర మోదీ నాయకత్వంలో దేశ ఆర్థిక వ్యవస్థ వేగంగా అభివృద్ధి చెందుతోందని ఆయన అభిప్రాయపడ్డారు.

ఈ సందర్భంగా సీఎం చంద్రబాబు మాట్లాడుతూ, ఈ అవార్డు రాష్ట్రానికి మరిన్ని పెట్టుబడులు తీసుకురావడానికి దోహదపడుతుందని ఆశాభావం వ్యక్తం చేశారు. ఏపీలో పెట్టుబడుల ఆకర్షణే తమ ప్రధాన లక్ష్యమని, పారిశ్రామికవేత్తలు రాష్ట్రానికి రావాలని ఆయన ఆహ్వానించారు. “స్పీడ్ ఆఫ్ డూయింగ్ బిజినెస్” మరియు “స్పీడ్ ఆఫ్ డెలివరింగ్ గవర్నెన్స్” విధానాల ద్వారా పాలనను మరింత సమర్థవంతంగా అమలు చేస్తున్నామని తెలిపారు. ఏఐ డాక్టర్, ఏఐ ట్యూటర్, ఏఐ అగ్రానమీ వంటి ఆధునిక సేవలను అందుబాటులోకి తెస్తున్నట్లు చెప్పారు. క్వాంటం కంప్యూటింగ్, ఆర్టిఫిషియల్ ఇంటెలిజెన్స్ వంటి ఆధునిక సాంకేతికతలతో అభివృద్ధి దిశగా ముందుకు సాగుతున్నామని, 2047 వికసిత్ భారత్ లక్ష్యంలో ఆంధ్రప్రదేశ్ కీలక పాత్ర పోషించాలనే ఆకాంక్షను వ్యక్తం చేశారు.