SRH ఘన విజయం.. రాజస్థాన్‌పై మరోసారి ఆధిపత్యం

పంతొమ్మిదో సీజన్‌లో సన్‌రైజర్స్ హైదరాబాద్ అద్భుత ఫామ్‌ను కొనసాగిస్తోంది. ఉప్పల్‌లో హ్యాట్రిక్ విజయాల తర్వాత జైపూర్‌లో రాజస్థాన్ రాయల్స్‌పై ఘన విజయం సాధించింది. వైభవ్ సూర్యవంశీ (103) రికార్డు సెంచరీతో ఆతిథ్య జట్టుకు పెద్ద సవాల్ విసిరినప్పటికీ, ఇషాన్ కిషన్ (74), అభిషేక్ శర్మ (57) దూకుడుగా బ్యాటింగ్ చేసి మ్యాచ్‌ను SRH వైపుకు తిప్పారు. వీరిద్దరూ కీలక పునాది వేసిన తర్వాత వెంటవెంటనే ఔటైనా, హెన్రిచ్ క్లాసెన్ (29), నితీశ్ కుమార్ రెడ్డి (36) దూకుడు ఇన్నింగ్స్‌తో జట్టుకు నాలుగో విజయాన్ని అందించారు.

రాజస్థాన్ రాయల్స్ తరఫున వైభవ్ సూర్యవంశీ (103) తన సొంత గడ్డపై అద్భుత శతకంతో మెరిశాడు. కేవలం 36 బంతుల్లోనే వంద పరుగులు చేసి బౌలింగ్ దళాన్ని ఒత్తిడిలోకి నెట్టాడు. తొలి ఓవర్ నుంచే దూకుడుగా ఆడుతూ స్కోర్ బోర్డును వేగంగా ముందుకు నడిపించాడు. ధ్రువ్ జురెల్ (51)తో కలిసి కీలక భాగస్వామ్యం నెలకొల్పాడు. డెత్ ఓవర్లలో డొనోవాన్ ఫెరెరా (33) వేగంగా పరుగులు జోడించినా, సన్‌రైజర్స్ బౌలర్లు వరుసగా వికెట్లు తీసి రాజస్థాన్‌ను పరిమిత స్కోర్‌కే ఆపేశారు.