నేడు భద్రాచలంలో రాములోరి కల్యాణం

భద్రాచలంలో నేడు శ్రీరాములోరి కల్యాణ మహోత్సవం వైభవంగా జరగనుంది. మిథిలా స్టేడియంలో ఉదయం 10:30 గంటలకు ఈ కల్యాణ కార్యక్రమం ప్రారంభం కానుంది. ఈ సందర్భంగా వేలాది మంది భక్తులు పాల్గొనే అవకాశం ఉండటంతో ఆలయ పరిసరాల్లో విస్తృత ఏర్పాట్లు చేశారు.

ఈ వేడుకలో ముఖ్యమంత్రి రేవంత్ రెడ్డి దంపతులు పాల్గొని శ్రీరాముడికి పట్టువస్త్రాలు సమర్పించనున్నారు. అనంతరం ఉదయం 11 గంటలకు ఆలయ అభివృద్ధి పనులకు సంబంధించి భూమిపూజ కార్యక్రమాన్ని నిర్వహించనున్నారు. ఈ కార్యక్రమానికి అధికారులు ప్రత్యేక ఏర్పాట్లు చేశారు.

అలాగే ఉదయం 11:35 గంటలకు ముఖ్యమంత్రి శ్రీరాముల కల్యాణ మహోత్సవంలో పాల్గొని పూజలు నిర్వహించనున్నారు. ఈ సందర్భంగా భద్రాచలంలో భక్తుల రద్దీ భారీగా ఉండే అవకాశం ఉందని అధికారులు సూచించారు. భక్తులు సౌకర్యవంతంగా దర్శనం చేసుకునేలా అన్ని ఏర్పాట్లు చేపట్టినట్లు ఆలయ వర్గాలు వెల్లడించాయి.