కుటుంబంతో భద్రాచలం బయలుదేరిన సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి బేగంపేట విమానాశ్రయం నుంచి కుటుంబ సమేతంగా భద్రాచలం బయలుదేరారు. అక్కడ శ్రీ సీతారామచంద్రస్వామి వారిని దర్శించుకోనున్నారు. ఈ సందర్భంగా ఆలయ పరిసరాల్లో భద్రతా ఏర్పాట్లు కట్టుదిట్టంగా చేపట్టినట్లు అధికారులు తెలిపారు.

భద్రాచలంలో ఆలయ విస్తరణకు సంబంధించిన తొలి దశ అభివృద్ధి పనులకు సీఎం భూమిపూజ, శంకుస్థాపన చేయనున్నారు. సుమారు రూ.351 కోట్ల వ్యయంతో చేపట్టనున్న ఈ ప్రాజెక్ట్‌కు సంబంధించి కార్యక్రమాలు నిర్వహించేందుకు ప్రత్యేక ఏర్పాట్లు చేశారు. ఆలయ అభివృద్ధి దిశగా ఇది కీలక అడుగుగా భావిస్తున్నారు.

అనంతరం మిథిలా స్టేడియంలో నిర్వహించనున్న శ్రీ సీతారామచంద్రస్వామి వారి తిరుకళ్యాణ మహోత్సవంలో ముఖ్యమంత్రి పాల్గొననున్నారు. రాష్ట్ర ప్రభుత్వం తరపున స్వామివారికి పట్టు వస్త్రాలు, ముత్యాల తలంబ్రాలు సమర్పించనున్నారు. ఈ కార్యక్రమంలో భారీ సంఖ్యలో భక్తులు హాజరయ్యే అవకాశం ఉందని అధికారులు పేర్కొన్నారు.