సోనామార్గ్‌లో విరిగిపడ్డ మంచు చరియలు

గత కొన్ని రోజులుగా జమ్మూ కాశ్మీర్‌తో పాటు పలు రాష్ట్రాల్లో భారీ మంచు తుఫాన్ కొనసాగుతోంది. అధిక హిమపాతం కారణంగా రవాణా వ్యవస్థ పూర్తిగా స్తంభించగా, పర్యాటకులు తీవ్ర ఇబ్బందులు ఎదుర్కొంటున్నారు. ఈ నేపథ్యంలో జమ్మూ కాశ్మీర్‌లోని గందర్‌బల్ జిల్లాలో ఉన్న ప్రముఖ పర్యాటక కేంద్రం సోనామార్గ్‌లో భారీ మంచు చరియలు విరిగి పడ్డాయి.

మంగళవారం రాత్రి సుమారు 10:12 గంటల సమయంలో జరిగిన ఈ ఘటనలో మంచు చరియలు ఒక్కసారిగా భవనాలను కమ్మేశాయి. ఈ భీకర దృశ్యాలు అక్కడ ఏర్పాటు చేసిన  సీసీటీవీ కెమెరాల్లో రికార్డు అయ్యాయి. అయితే ఘటన సమయంలో ఆ ప్రాంతంలో ఎవరూ లేకపోవడంతో ఎటువంటి ప్రాణనష్టం జరగలేదని అధికారులు తెలిపారు. ముందస్తు హెచ్చరికల నేపథ్యంలో సహాయక బృందాలు అప్రమత్తంగా ఉండగా, పర్యాటకులు మరియు స్థానికులు కొండ ప్రాంతాలకు వెళ్లవద్దని యంత్రాంగం సూచించింది.