Mann Ki Baat 129 ఎపిసోడ్ లో 2025 అపూర్వ ఘటన లను గుర్తు చేసిన ప్రధాని మోదీ

న్యూఢిల్లీ: ‘మన్ కీ బాత్’ 129వ ఎపిసోడ్‌లో ప్రధాని Narendra Modi 2025 సంవత్సరాన్ని జాతీయ గర్వం, భద్రత, క్రీడా విజయాలు, శాస్త్రీయ ప్రగతి, సాంస్కృతిక ఐక్యతతో నిండిన ఏడాదిగా అభివర్ణించారు. ఆపరేషన్ సిందూర్ ద్వారా భద్రత బలోపేతం కావడం, ‘వందే మాతరం’ 150వ వార్షికోత్సవం జాతీయ భావాన్ని మరింత పెంచిందని చెప్పారు. క్రీడల్లో భారత్ సత్తా చాటిందని, పురుషుల క్రికెట్ జట్టు ఐసీసీ ఛాంపియన్స్ ట్రోఫీ గెలవడం, మహిళల జట్టు తొలి ప్రపంచకప్ సాధించడం, మహిళల బ్లైండ్ టీ20 ప్రపంచకప్ విజయం సాధించడం విశేషమన్నారు. పారా అథ్లెట్లు ప్రపంచ ఛాంపియన్‌షిప్‌ల్లో పతకాలు సాధించడం దేశానికి గర్వకారణమని తెలిపారు.

శాస్త్ర సాంకేతిక రంగంలోనూ భారత్ ముందంజలో నిలిచిందని ప్రధాని చెప్పారు. శుభాంశు శుక్లా అంతర్జాతీయ అంతరిక్ష కేంద్రానికి చేరిన తొలి భారతీయుడిగా చరిత్ర సృష్టించారని గుర్తు చేశారు. పర్యావరణ పరిరక్షణలో చిరుతల సంఖ్య 30 దాటడం సానుకూల పరిణామమని పేర్కొన్నారు. ప్రార్థనా, సాంస్కృతిక రంగాల్లో ప్రయాగ్‌రాజ్ మహాకుంభమేళా నుంచి అయోధ్య రామాలయంలో జెండా ఆవిష్కరణ వరకు జరిగిన కార్యక్రమాలు దేశ ఐక్యతను చాటాయని అన్నారు.

దేశీయ ఉత్పత్తులపై డిమాండ్ పెరగడం జాతీయ ఆత్మవిశ్వాసాన్ని పెంచిందని ప్రధాని తెలిపారు. కాశీ తమిళ సంగమం వంటి కార్యక్రమాల ప్రభావంతో తమిళ భాషపై ఆసక్తి పెరుగుతోందని చెప్పారు. యువత పాత్రపై దృష్టి సారిస్తూ, 2026 జనవరి 12న జాతీయ యువజన దినోత్సవం సందర్భంగా ‘విక్సిత్ భారత్ యంగ్ లీడర్స్ డైలాగ్’ నిర్వహిస్తామని, తాను స్వయంగా హాజరవుతానని ప్రకటించారు.