హైదరాబాదు వాతావరణ శాఖ నుంచి ముఖ్యమైన హెచ్చరిక

పశ్చిమ మధ్య బంగాళాఖాతంలో కొనసాగుతున్న ఉపరితల ఆవర్తనం ప్రభావంతో తెలంగాణలో భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. ఖమ్మం, నల్గొండ, వరంగల్, మహబూబ్ నగర్ సహా 10 జిల్లాలకు ఎల్లో అలర్ట్ జారీ చేశారు. నిన్న(మంగళవారం) ఖమ్మం జిల్లా కారేపల్లిలో 7.0 సెం.మీ. అత్యధిక వర్షపాతం నమోదైంది. ఈ అకాల వర్షాల కారణంగా రైతాంగం తమ వ్యవసాయ ఉత్పత్తులను కాపాడుకోవడానికి ముందస్తు జాగ్రత్తలు తీసుకోవాలని అధికారులు సూచించారు. తెలంగాణ రాష్ట్రంలో వాతావరణ పరిస్థితులు ఒక్కసారిగా మారిపోయాయి. పశ్చిమ మధ్య బంగాళాఖాతంలో కోస్తాంధ్ర తీరానికి ఆనుకుని కొనసాగుతున్న ఉపరితల ఆవర్తనం ప్రభావంతో రాష్ట్రంలో తేలికపాటి నుండి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం (ఐఎండీ) హెచ్చరించింది. సముద్ర మట్టానికి 0.9 కిలోమీటర్ల ఎత్తులో ఈ ఉపరితల ఆవర్తనం కొనసాగుతోంది. దీనికి తోడు.. రాష్ట్రంలో తక్కువ ఎత్తులో ఉత్తర, వాయువ్య దిశల నుండి గాలులు వీస్తున్నాయి.

ఈ వాతావరణ పరిస్థితుల మొత్తం ప్రభావం కారణంగా.. రానున్న 12 గంటల్లో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ తెలిపింది. నవంబర్ 5వ తేదీన రాష్ట్రంలోని పలు ప్రాంతాల్లో తేలికపాటి నుంచి ఒక మోస్తరు వర్షాలు, ముఖ్యంగా కొన్ని జిల్లాల్లో భారీ వర్షాలు (Heavy Rains) కురిసే అవకాశం ఉందని ఐఎండీ అంచనా వేసింది. ఈ వర్షాల దృష్ట్యాజ. ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ, సంగారెడ్డి, వికారాబాద్, మహబూబ్ నగర్, నాగర్ కర్నూల్ జిల్లాలకు వాతావరణ శాఖ ఎల్లో అలర్ట్‌ను జారీ చేసింది.

ఈ జిల్లాల ప్రజలు అప్రమత్తంగా ఉండాలని సూచించింది. నేడు (మంగళవారం) కూడా రాష్ట్రంలోని పలు జిల్లాల్లో ఊహించని విధంగా భారీ వర్షాలు కురిశాయి. కొన్ని ప్రాంతాల్లో రికార్డు స్థాయిలో వర్షపాతం నమోదైంది. అత్యధికంగా ఖమ్మం జిల్లా కారేపల్లిలో 7.0 సెం.మీ., నాగర్‌కర్నూల్ జిల్లా పెద్దూర్‌లో 7.0 సెం.మీ., రంగారెడ్డి జిల్లా చుక్కాపూర్‌లో 6.5 సెం.మీ., వికారాబాద్ జిల్లా బషీరాబాద్‌లో 6.4 సెం.మీ., నాగర్‌కర్నూల్ జిల్లా కుమ్మెరలో 5.5 సెం.మీ., మరియు రంగారెడ్డి జిల్లా తొమ్మిదిరేకులలో 5.0 సెం.మీ. చొప్పున వర్షపాతం నమోదైంది. ఈ అకాల వర్షాల కారణంగా రైతాంగం తమ వ్యవసాయ ఉత్పత్తులను కాపాడుకోవడానికి ముందస్తు చర్యలు తీసుకోవాలని అధికారులు సూచిస్తున్నారు. అత్యవసరం అయితే తప్ప, ప్రయాణాలు వాయిదా వేసుకోవాలని అధికారులు పేర్కొన్నారు. ముఖ్యంగా లోతట్టు ప్రాంతాలు, వరద వచ్చే అవకాశమున్న రహదారుల వైపు వెళ్లవద్దని సూచించారు.