బ్లూటూత్ పేరు “బాంబ్”తో విమానంలో కలకలం

ఒక బ్లూటూత్ డివైజ్ పేరు కారణంగా అమెరికాలో యునైటెడ్ ఎయిర్‌లైన్స్ విమానంలో కలకలం రేగింది. న్యూజెర్సీలోని నెవార్క్ నుంచి స్పెయిన్‌కు 190 మంది ప్రయాణికులు, 12 మంది సిబ్బందితో బయల్దేరిన బోయింగ్ విమానం, ప్రయాణంలో ఉన్నప్పుడు “బాంబ్” అనే పేరుతో ఉన్న బ్లూటూత్ డివైజ్ కనిపించడంతో ఆందోళనకు గురైంది.

సిబ్బంది వెంటనే ప్రయాణికులను తమ బ్లూటూత్ ఆఫ్ చేయాలని సూచించారు. అయితే ఆ డివైజ్ పేరు రెండు గంటల పాటు యాక్టివ్‌గా ఉండటంతో భద్రతా కారణాల దృష్ట్యా ఎమర్జెన్సీ ప్రకటించారు. వెంటనే విమానాన్ని వెనక్కి మళ్లించి నెవార్క్‌లో సురక్షితంగా ల్యాండ్ చేశారు. ఈ ఘటన శనివారం జరగగా, సోషల్ మీడియా ద్వారా వెలుగులోకి వచ్చింది.