ఫ్రీమాంట్ హత్య సంచలనం: భారతీయ మూలాల వ్యక్తి, లైంగిక నేరస్థుడిని హతమార్చాడు

ఫ్రీమాంట్, కాలిఫోర్నియా: అమెరికాలో సంచలనంగా మారిన ఘటనలో, 29 ఏళ్ల వరుణ్ సురేష్, ఓ లైంగిక నేరస్థుడిని కత్తితో దారుణంగా హతమార్చిన కేసులో హత్య ఆరోపణలు ఎదుర్కొంటున్నారు. ఈ ఘటన గత వారం ఫ్రీమాంట్‌లో చోటుచేసుకుంది. పోలీసులు సంఘటనా స్థలంలోనే సురేష్‌ను అదుపులోకి తీసుకుని కత్తిని స్వాధీనం చేసుకున్నారు. బాధితుడు 71 ఏళ్ల డేవిడ్ బ్రిమ్మర్ అక్కడికక్కడే మరణించాడు. ఇది ఈ ఏడాది ఫ్రీమాంట్‌లో నమోదైన ఐదో హత్య కేసు.

పోలీసుల ప్రకారం, సెప్టెంబర్ 18న మధ్యాహ్నం 12:01 గంటలకు అప్పర్ వింట్నర్స్ సర్కిల్ వద్ద ఘర్షణ జరుగుతోందని కాల్ వచ్చింది. సంఘటనా స్థలానికి చేరుకున్న పోలీసులు, బ్రిమ్మర్‌ను తీవ్ర గాయాలతో రక్తపు మడుగులో కనుగొన్నారు. వైద్య సహాయం చేసినా ఫలితం లేకుండా ఆయన అక్కడికక్కడే మృతి చెందారు.

కోర్టు పత్రాల ప్రకారం, సురేష్ మేగన్స్ లా డేటాబేస్ ద్వారా లైంగిక నేరస్థుల వివరాలు తెలుసుకొని బ్రిమ్మర్‌ను లక్ష్యంగా ఎంచుకున్నాడు. మైనర్‌పై లైంగిక దాడి కేసులో తొమ్మిది ఏళ్ల జైలు శిక్ష అనుభవించిన బ్రిమ్మర్‌కు, సురేష్‌తో ఎలాంటి వ్యక్తిగత సంబంధం లేదని పోలీసులు వెల్లడించారు.

దర్యాప్తు ప్రకారం, సురేష్ సర్టిఫైడ్ పబ్లిక్ అకౌంటెంట్ అని చెప్పి బ్రిమ్మర్ ఇంటికి వెళ్లాడు. ప్రమాదం గ్రహించిన బ్రిమ్మర్ పారిపోవడానికి ప్రయత్నించగా, సురేష్ రెండు బ్లాక్స్ వెంబడించి పొరుగింటి గ్యారేజ్, కిచెన్ వరకు వెళ్లి మెడపై కత్తితో దాడి చేశాడు. “పశ్చాత్తాపం వ్యక్తం చేయి” అని డిమాండ్ చేస్తూ ఆయన గొంతు కోశాడు.

పోలీసుల విచారణలో, బ్రిమ్మర్ వయసు, బలహీనత కారణంగా తానే టార్గెట్ చేశానని, హత్య చేయడం “చాలా సరదాగా అనిపించింది” అని సురేష్ ఒప్పుకున్నాడు. “నాకు పేడోఫైల్స్ నచ్చరు. వారు చచ్చిపోవాలి” అని కూడా అన్నాడు. తాను పారిపోవాలని ఎప్పుడూ ఆలోచించలేదని, పోలీసులు రాకపోయినా తానే వారిని పిలిచేవాడినని తెలిపాడు.

హత్య ఆరోపణలతో పాటు, రెసిడెన్షియల్ బర్గ్లరీ, డెడ్‌లీ వెపన్ వాడి గాయపరిచిన కేసులు కూడా సురేష్‌పై నమోదు అయ్యాయి. గతంలో కూడా అతనిపై క్రిమినల్ కేసులు ఉన్నాయి. 2021లో ఫ్రీమాంట్ పోలీసులు అతన్ని దొంగతనం, తప్పుడు బాంబు బెదిరింపులు, క్రిమినల్ థ్రెట్లు కేసుల్లో అరెస్ట్ చేశారు. ప్రస్తుతం వాల్నట్ క్రీక్ పోలీసులు నమోదు చేసిన మరో కేసులో కూడా ఆయన నిందితుడే.