అమెరికాలో భూకంపం

అమెరికాలోని నెవాడా రాష్ట్రంలో బలమైన భూకంపం సంభవించింది. భూకంప తీవ్రత 5.7గా నమోదైనట్లు యునైటెడ్ స్టేట్స్ భూగర్భ సర్వే సంస్థ వెల్లడించింది. భూకంప కేంద్రం నెవాడాలోని సిల్వర్ స్ప్రింగ్స్‌కు తూర్పు-ఆగ్నేయ దిశలో సుమారు 20 కిలోమీటర్ల దూరంలో ఉన్నట్లు తెలిపింది. ఈ ప్రకంపనలు భూమి ఉపరితలం నుంచి సుమారు 9 నుంచి 10 కిలోమీటర్ల లోతులో సంభవించాయి. తక్కువ లోతులో భూకంపం సంభవించడంతో ప్రకంపనలు తీవ్రంగా అనిపించాయని సమాచారం. భూకంపం కారణంగా ప్రజలు భయంతో ఇళ్ల నుంచి బయటకు పరుగులు తీశారు.

ఈ ప్రభావం రెనో నగరంలో కూడా కనిపించగా, పలు భవనాలు స్వల్పంగా కంపించినట్లు తెలిసింది. అయితే ఇప్పటివరకు ఎలాంటి ప్రాణ నష్టం లేదా ఆస్తి నష్టం గురించి అధికారిక సమాచారం బయటకు రాలేదు. అధికారులు పరిస్థితిని నిరంతరం పర్యవేక్షిస్తూ మరిన్ని వివరాలను సేకరిస్తున్నారు. నెవాడా రాష్ట్రం భూకంపాలకు ప్రసిద్ధి చెందిన ప్రాంతంగా ఉండటంతో ఇక్కడ తరచుగా చిన్న నుండి మధ్యస్థ తీవ్రత గల భూకంపాలు సంభవిస్తుంటాయి.