అవుట్‌లుక్ లైట్ యాప్‌కు గుడ్‌బై చెప్పిన మైక్రోసాఫ్ట్

మైక్రోసాఫ్ట్ సంస్థ ఆండ్రాయిడ్ వినియోగదారుల కోసం రూపొందించిన అవుట్‌లుక్ లైట్ యాప్ సేవలను నిలిపివేస్తున్నట్లు అధికారికంగా ప్రకటించింది. తక్కువ డేటా, తక్కువ మెమరీతో పనిచేసే ఈ యాప్ వచ్చే నెల 25, 2026 నుంచి పూర్తిగా నిలిచిపోనుంది.

నెమ్మదిగా పనిచేసే ఇంటర్నెట్, తక్కువ స్టోరేజ్ ఉన్న ఫోన్ల కోసం ఈ యాప్‌ను గతంలో అందుబాటులోకి తీసుకొచ్చారు. అయితే ఇప్పుడు మొబైల్ ఈమెయిల్ సేవలను ఒకే వేదికపై అందించాలనే లక్ష్యంతో మైక్రోసాఫ్ట్ తన వ్యూహాన్ని మార్చుకుంది.

గడువు ముగిసిన తర్వాత ఈ యాప్ ద్వారా మెయిల్స్ చూడడం, పంపడం లేదా క్యాలెండర్ నిర్వహణ సాధ్యం కాదని సంస్థ తెలిపింది. వినియోగదారులు వెంటనే ప్రధాన అవుట్‌లుక్ మొబైల్ యాప్‌కు మారాలని సూచించింది. అందులో లాగిన్ అయితే పాత డేటా ఆటోమేటిక్‌గా సింక్ అవుతుంది.