ఎస్ఆర్హెచ్–రాజస్థాన్ మ్యాచ్‌లో దివ్యాంగులకు హెచ్‌సీఏ ప్రత్యేక పాసులు!

సామాజిక బాధ్యతను చాటుతూ హైదరాబాద్ క్రికెట్ అసోసియేషన్ (హెచ్‌సీఏ) తీసుకున్న నిర్ణయం ప్రశంసలు అందుకుంటోంది. ఎస్ఆర్హెచ్–రాజస్థాన్ రాయల్స్ మ్యాచ్ సందర్భంగా 30 మంది దివ్యాంగులకు ఉచిత కాంప్లిమెంటరీ పాసులు జారీ చేసి, స్టేడియంలో ప్రత్యక్షంగా మ్యాచ్‌ను వీక్షించే అవకాశం కల్పించింది. ఈ చర్యతో క్రీడలలో సమాన అవకాశాల ప్రాముఖ్యతను మరోసారి చాటింది.

మ్యాచ్‌ను ప్రత్యక్షంగా వీక్షించడం తమకు కొత్త అనుభూతి అని దివ్యాంగులు ఆనందం వ్యక్తం చేశారు. ఈ సందర్భంగా హెచ్‌సీఏ కార్యదర్శి మన్నె జీవన్ రెడ్డి గ్యాలరీలో వారితో కలిసి కూర్చొని మ్యాచ్‌ను వీక్షిస్తూ, వారితో మమేకమై జట్టుకు మద్దతు తెలిపారు. ఆయన ఈ చర్యతో అందరి మనసులు గెలుచుకున్నారు.