15 ఏళ్ల వైభవ్‌కు బిగ్ ఛాన్స్.. టీమిండియాలోకి అడుగుపెట్టనున్నాడా?

ప్రస్తుతం భారత క్రికెట్‌లో అందరి దృష్టిని ఆకర్షిస్తున్న యువ ఆటగాడు వైభవ్ సూర్యవంశీ. ఈ 15 ఏళ్ల కుర్రాడికి తాజాగా శుభవార్త లభించినట్లు సమాచారం. త్వరలోనే అతను తన కెరీర్‌లో మరో కీలక మైలురాయిని చేరుకునే అవకాశముంది. ఐర్లాండ్ పర్యటన కోసం సెలక్షన్ కమిటీ అతన్ని పరిశీలనలోకి తీసుకున్నట్లు వార్తలు వెలువడుతున్నాయి. యువ ఆటగాళ్ల ప్రతిభను పరీక్షించేందుకు ఈ పర్యటనకు వారిని పంపాలనే ఆలోచనలో ఉన్నట్లు తెలుస్తోంది. ఇదే నేపథ్యంలో జింబాబ్వే పర్యటనకు కూడా వైభవ్ ఎంపికయ్యే అవకాశం ఉందని నివేదికలు చెబుతున్నాయి. ఒకవేళ అతను ఈ సిరీస్‌లో ఆడే అవకాశం దక్కించుకుంటే, భారత క్రికెట్ చరిత్రలోనే అత్యంత పిన్న వయసులో అంతర్జాతీయ మ్యాచ్ ఆడిన ఆటగాడిగా నిలిచే అవకాశం ఉంది.

ఈ ఐపీఎల్ సీజన్‌లో వైభవ్ ప్రదర్శన అందరినీ ఆకట్టుకుంది. ఆర్‌సీబీపై 26 బంతుల్లో 78 పరుగులు, సీఎస్‌కేపై 17 బంతుల్లో 52 పరుగులు, ముంబై ఇండియన్స్‌పై 14 బంతుల్లో 39 పరుగులు చేసి తన ప్రతిభను నిరూపించాడు. అతని ఈ అద్భుత ప్రదర్శనపై పలువురు మాజీ క్రికెటర్లు ప్రశంసలు కురిపించారు. వైభవ్ వంటి ప్రతిభావంతుడైన ఆటగాడు చాలా అరుదుగా కనిపిస్తాడని వారు అభిప్రాయపడ్డారు. అంతర్జాతీయ క్రికెట్‌కు అతను సిద్ధంగా ఉన్నాడని పలువురు నిపుణులు కూడా అభిప్రాయపడుతున్నారు.