

భారత నౌకాదళం నీటి అడుగున పోరాట సామర్థ్యాన్ని మరింత పెంచేందుకు కేంద్ర ప్రభుత్వం కీలక ప్రణాళికలు సిద్ధం చేస్తోంది. మొత్తం రూ.1.11 లక్షల కోట్ల అంచనా వ్యయంతో తొమ్మిది కొత్త జలాంతర్గాముల నిర్మాణానికి ప్రతిపాదనలు రూపొందించినట్లు సమాచారం. వీటిలో రూ.75 వేల కోట్లతో ప్రాజెక్ట్-75(I) కింద ఆరు అత్యాధునిక జలాంతర్గాములను దేశంలోనే తయారు చేయనున్నారు. ఇందుకోసం మజగావ్ డాక్ షిప్బిల్డర్స్ లిమిటెడ్ (MDL), జర్మనీకి చెందిన థైసెన్క్రుప్ మెరైన్ సిస్టమ్స్ (TKMS)తో కలిసి పనిచేయనున్నాయి. ఈ ప్రాజెక్టు ద్వారా దేశీయ రక్షణ రంగ తయారీ సామర్థ్యంతో పాటు నౌకాదళ బలం కూడా పెరగనుంది.
మరోవైపు సుమారు రూ.36 వేల కోట్లతో అదనంగా మూడు స్కార్పీన్ తరహా జలాంతర్గాములను నిర్మించేందుకు ప్రణాళికలు ఉన్నాయి. వీటిని కూడా మజగావ్ డాక్లోనే తయారు చేయనున్నారు. ఈ తొమ్మిది జలాంతర్గాములు అందుబాటులోకి వస్తే హిందూ మహాసముద్ర ప్రాంతంలో భారత నౌకాదళ సామర్థ్యం మరింత బలోపేతం కానుంది. చైనా, పాకిస్తాన్ నుంచి ఎదురయ్యే సముద్ర భద్రతా సవాళ్లను సమర్థంగా ఎదుర్కొనేందుకు ఈ ప్రాజెక్టులు దోహదపడనున్నాయి. మరో కీలక చర్యగా కొచ్చిలో SEATEC సోనార్ టెస్టింగ్ కేంద్రాన్ని ఏర్పాటు చేయనున్నారు. ఇది జలాంతర్గాములకు సంబంధించిన ఆధునిక సోనార్ వ్యవస్థల పరీక్షలకు ఉపయోగపడనుంది.



కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!