తెలంగాణ రైజింగ్ 2047 విజన్‌కు వరల్డ్ ఎకనామిక్ ఫోరం మద్దతు!

దావోస్‌లో జరుగుతున్న వరల్డ్ ఎకనామిక్ ఫోరం సదస్సులో ఏర్పాటు చేసిన తెలంగాణ పెవిలియన్‌లో ముఖ్యమంత్రి ఎ. రేవంత్ రెడ్డి, వరల్డ్ ఎకనామిక్ ఫోరం మేనేజింగ్ డైరెక్టర్ జెరెమీ జర్గెన్స్, C4IR నెట్‌వర్క్ కోఆర్డినేషన్ హెడ్ మంజు జార్జ్‌లతో కీలక సమావేశం నిర్వహించారు. ఈ సందర్భంగా తెలంగాణ రైజింగ్ 2047 విజన్ లక్ష్యాలు, భవిష్యత్ ఆర్థిక ప్రణాళికలు మరియు హైదరాబాద్‌లో ప్రతి ఏడాది జూలైలో WEF ఫాలో-అప్ సమావేశం నిర్వహించే ప్రతిపాదనలపై చర్చించారు.

దావోస్‌లో జరిగే చర్చలు, నిర్ణయాల పురోగతిని సమీక్షించేందుకు హైదరాబాద్‌లో ఫాలో-అప్ ఫోరం ఎంతో ఉపయోగకరమని సీఎం పేర్కొన్నారు. తెలంగాణలో ఉన్న పారిశ్రామిక అవకాశాలు, పెట్టుబడులకు అనుకూల వాతావరణం, ప్రభుత్వ ప్రోత్సాహకాలను ప్రపంచానికి పరిచయం చేయాలనే ఉద్దేశంతో ఈ సమావేశాన్ని నిర్వహించాలని కోరారు. ముఖ్యమంత్రి ప్రతిపాదనకు WEF బృందం సానుకూలంగా స్పందించింది. తెలంగాణ రైజింగ్ విజన్‌లో భాగస్వామ్యం వహిస్తామని జెరెమీ జర్గెన్స్ స్పష్టం చేస్తూ, రాష్ట్రాన్ని 3 ట్రిలియన్ డాలర్ల ఆర్థిక వ్యవస్థగా తీర్చిదిద్దే దిశగా కలిసి పనిచేస్తామని హామీ ఇచ్చారు.