ప్రభుత్వ రంగ బ్యాంకులకు పొదుపు చర్యలపై కేంద్రం కీలక ఆదేశాలు

ప్రభుత్వ రంగ బ్యాంకులు, బీమా సంస్థలు, ఇతర ఆర్థిక సంస్థలు పొదుపు చర్యలను మరింత కట్టుదిట్టంగా అమలు చేయాలని కేంద్ర ప్రభుత్వం సూచించింది. ఆర్థిక మంత్రిత్వ శాఖ పరిధిలోని ఆర్థిక సేవల విభాగం (Department of Financial Services) ఈ మేరకు సర్క్యులర్ జారీ చేస్తూ వ్యయ నియంత్రణ, ఆర్థిక క్రమశిక్షణకు ప్రాధాన్యత ఇవ్వాలని ఆదేశించింది.

ఈ చర్యల్లో భాగంగా విదేశీ పర్యటనలను తగ్గించుకోవాలని, అధికారిక అవసరాల కోసం దశలవారీగా ఎలక్ట్రిక్ వాహనాల వినియోగాన్ని పెంచాలని సూచించింది. ఈ మార్గదర్శకాలను స్టేట్ బ్యాంక్ ఆఫ్ ఇండియా, బ్యాంక్ ఆఫ్ ఇండియా, లైఫ్ ఇన్సూరెన్స్ కార్పొరేషన్ ఆఫ్ ఇండియా వంటి ప్రధాన సంస్థల అధిపతులకు పంపినట్లు సమాచారం. సమర్థవంతమైన, స్థిరమైన ఆర్థిక నిర్వహణ కోసం ఈ చర్యలు కీలకమని కేంద్రం పేర్కొంది.