రష్యా జెండా నౌకను సీజ్ చేసిన అమెరికా

ఉత్తర అట్లాంటిక్ మహాసముద్రంలో తీవ్ర ఉద్రిక్త పరిస్థితులు నెలకొన్నాయి. రష్యా జెండాతో ప్రయాణిస్తున్న వెనెజువెలా చమురు నౌక మ్యారినెరా తో పాటు మరో నౌకను అమెరికా బుధవారం స్వాధీనం చేసుకోవడంతో అంతర్జాతీయంగా కలకలం రేగింది. ఈ ఆపరేషన్‌కు బ్రిటన్ మద్దతు ఇవ్వడం పరిస్థితిని మరింత ఉద్రిక్తంగా మార్చింది.

అమెరికా నౌకాదళం హెలికాప్టర్ల సహాయంతో నౌకపైకి మెరైన్ సిబ్బందిని దించి, అందులోని సిబ్బందిని అదుపులోకి తీసుకుంది. అనంతరం నౌకను దక్షిణ దిశగా మళ్లించింది. ఐస్‌లాండ్ దక్షిణ తీరానికి సమీపంలో ఈ చర్య చేపట్టినట్లు సమాచారం. ఇదే సమయంలో ఎలాంటి జాతీయ జెండా లేని మరో నౌకను కూడా అమెరికా సీజ్ చేసింది.

ఈ నౌకలు రష్యా, ఇరాన్, వెనెజువెలా నుంచి ఆసియా దేశాలకు చమురు సరఫరా చేస్తూ అంతర్జాతీయ ఆంక్షలను ఉల్లంఘించాయని అమెరికా ఆరోపిస్తోంది. ఇప్పటికే 2024 లోనే ఈ నౌకపై ఆంక్షలు విధించినట్లు వెల్లడించింది. అయితే ఈ చర్య పై రష్యా తీవ్ర అభ్యంతరం వ్యక్తం చేసింది. నౌక అంతర్జాతీయ జలాల్లో చట్టబద్ధంగా ప్రయాణిస్తోందని, 1982 ఐక్యరాజ్యసమితి సముద్ర చట్టానికి విరుద్ధంగా అమెరికా సీజ్ చేసిందని రష్యా పేర్కొంది. నౌక సిబ్బంది హక్కులను కాపాడాలని డిమాండ్ చేసింది.

ఈ ఘటనతో ఉత్తర అట్లాంటిక్ ప్రాంతంలో భద్రతా పరిస్థితులు మరింత సున్నితంగా మారాయని అంతర్జాతీయ విశ్లేషకులు అభిప్రాయపడుతున్నారు.