సీబీఎస్‌ఈ రీవాల్యూయేషన్ పోర్టల్‌పై సైబర్ దాడి యత్నం

సీబీఎస్‌ఈ రీవాల్యూయేషన్ దరఖాస్తుల ప్రక్రియ కొనసాగుతున్న సమయంలో తమ ఆన్‌లైన్ పోర్టల్‌పై భారీ సైబర్ దాడి యత్నాలు జరిగాయని బోర్డు వెల్లడించింది. మధ్యాహ్నం 3 గంటల వరకు సుమారు 16 వేల మంది విద్యార్థులు రీవాల్యూయేషన్ కోసం దరఖాస్తు చేసుకున్నారని తెలిపింది. ఇదే సమయంలో డినయల్-ఆఫ్-సర్వీస్ (DoS) విధానంలో దాడికి ప్రయత్నించగా, కేవలం రెండు నిమిషాల వ్యవధిలోనే దాదాపు 15 లక్షల లాగిన్ ప్రయత్నాలు నమోదయ్యాయని పేర్కొంది. అంతేకాకుండా ఫైళ్లు, సిస్టమ్‌లలోకి అనధికార ప్రవేశం కోసం లక్షకు పైగా సైబర్ దాడి ప్రయత్నాలను గుర్తించినట్లు వెల్లడించింది.

అయితే ఈ దాడులు జరిగినప్పటికీ పోర్టల్ నిరంతరాయంగా పనిచేస్తోందని సీబీఎస్‌ఈ స్పష్టం చేసింది. ఒకేసారి 8 వేల మందికిపైగా విద్యార్థుల దరఖాస్తులను స్వీకరించే సామర్థ్యం ఈ పోర్టల్‌కు ఉందని తెలిపింది. సాంకేతిక బృందాలు 24 గంటలూ వ్యవస్థను పర్యవేక్షిస్తున్నాయని, ఏ సమస్య వచ్చినా వెంటనే స్పందిస్తున్నాయని పేర్కొంది. ఇదిలా ఉండగా, 12వ తరగతి ఫలితాల్లో కొత్తగా ప్రవేశపెట్టిన ఆన్-స్క్రీన్ మార్కింగ్ (OSM) విధానంపై కొందరు విద్యార్థులు అభ్యంతరాలు వ్యక్తం చేసిన నేపథ్యంలో, జవాబు పత్రాల స్కాన్ కాపీలను అందజేసి రీవాల్యూయేషన్‌కు అవకాశం కల్పిస్తున్నట్లు బోర్డు వెల్లడించింది. సైబర్ దాడులను విజయవంతంగా అడ్డుకున్నామని సీబీఎస్‌ఈ స్పష్టం చేసింది.