తెలంగాణకు మరో రెండు అమృత్ భారత్ రైళ్లు

తెలుగు ప్రయాణికులకు కేంద్ర ప్రభుత్వం మరో శుభవార్త చెప్పింది. అమృత్ భారత్ కేటగిరీలో మరో రెండు కొత్త రైళ్లను తెలంగాణకు కేటాయించింది. ఈ రైళ్లు చర్లపల్లి–నాగర్ కోయల్, నాంపల్లి–తిరువనంతపురం మార్గాల్లో ఏపీ మీదుగా రాకపోకలు సాగించనున్నాయి. ప్రయాణికుల రద్దీ పెరుగుతున్న నేపథ్యంలో ఈ నిర్ణయం తీసుకున్నట్లు అధికారులు తెలిపారు.

ఈ కొత్త అమృత్ భారత్ రైళ్లను ఈ నెల 23న ప్రధాని నరేంద్ర మోదీ ప్రారంభించే అవకాశం ఉందని సమాచారం. ఈ రైళ్లు అందుబాటులోకి వస్తే హైదరాబాద్ నుంచి నడిచే అమృత్ భారత్ రైళ్ల సంఖ్య మూడుకు పెరుగుతుంది. దీని ద్వారా దక్షిణ భారత రాష్ట్రాల మధ్య ప్రయాణం మరింత సౌకర్యవంతంగా మారనుందని ప్రయాణికులు ఆనందం వ్యక్తం చేస్తున్నారు.