సూపర్ స్టార్ కృష్ణ జయంతి సందర్భంగా ‘పోలీస్ కంప్లైంట్’ ట్రైలర్ విడుదల

ఎంఎస్‌కే ప్రమిద శ్రీ ఫిలిమ్స్ బ్యానర్‌పై బాలకృష్ణ మహారాణా నిర్మాణంలో, క్రియేటివ్ డైరెక్టర్ సంజీవ్ మేగోటి దర్శకత్వంలో తెరకెక్కిన హారర్-యాక్షన్ థ్రిల్లర్ ‘పోలీస్ కంప్లైంట్’ జూన్ 12న ప్రేక్షకుల ముందుకు రానుంది. ఈ చిత్ర ట్రైలర్‌తో పాటు రెండు ప్రత్యేక గీతాలను హైదరాబాద్‌లోని ప్రసాద్ ల్యాబ్‌లో ఘనంగా నిర్వహించిన కార్యక్రమంలో విడుదల చేశారు. సూపర్ స్టార్ కృష్ణ జయంతి సందర్భంగా నిర్వహించిన ఈ వేడుకలో ఆయనకు ఘన నివాళులు అర్పిస్తూ ప్రత్యేక కార్యక్రమాలు చేపట్టారు.

సూపర్ స్టార్ కృష్ణ నటించిన పలు క్లాసిక్ చిత్రాలను గుర్తు చేసే ప్రత్యేక గీతం ఈ కార్యక్రమంలో ప్రధాన ఆకర్షణగా నిలిచింది. నటుడు కృష్ణసాయి, ప్రీతి సుందర్ ఈ పాటలో కనిపించగా, కృతి వర్మ నటించిన మరో ప్రత్యేక గీతాన్ని కూడా విడుదల చేశారు. దర్శకుడు సంజీవ్ మేగోటి మాట్లాడుతూ, 52 మంది ఆర్టిస్టులతో కేవలం 45 రోజుల్లో చిత్రాన్ని పూర్తి చేశామని తెలిపారు. ‘చైన్ రియాక్షన్ ఆఫ్ కర్మ’ అనే వినూత్న కాన్సెప్ట్‌తో రూపొందిన ఈ చిత్రం హారర్, యాక్షన్, కామెడీ, రొమాన్స్, థ్రిల్లర్ అంశాల సమ్మేళనంగా ప్రేక్షకులకు కొత్త అనుభూతిని అందించనుందని చెప్పారు.