నాటో దేశాలపై ట్రంప్‌ అనుమానం.. బ్రిటన్‌ నుంచి తీవ్ర స్పందన

అమెరికా అధ్యక్షుడు డొనాల్డ్‌ ట్రంప్‌ నాటో సభ్య దేశాలపై చేసిన వ్యాఖ్యలు అంతర్జాతీయంగా చర్చకు దారితీశాయి. తమ దేశానికి ప్రమాదం ఏర్పడితే నాటో దేశాలు అండగా నిలుస్తాయని తాను నమ్మడం లేదని ట్రంప్‌ ఓ ఇంటర్వ్యూలో పేర్కొన్నారు. అవసరమైనప్పుడు నాటో దేశాలు ముందుండి పోరాడలేదని, యుద్ధాల్లో వెనకే ఉన్నాయని వ్యాఖ్యానించారు. అఫ్గానిస్థాన్‌ యుద్ధాన్ని ఉదాహరణగా ప్రస్తావిస్తూ అమెరికా సేనలే ప్రధానంగా పోరాడాయని అన్నారు. ఈ వ్యాఖ్యలు నాటో సభ్య దేశాల్లో అసంతృప్తిని రేకెత్తించాయి.

ట్రంప్‌ వ్యాఖ్యలపై బ్రిటన్‌ ప్రధాని కీర్‌ స్టార్మర్‌ తీవ్రంగా స్పందించారు. అఫ్గానిస్థాన్‌ యుద్ధంలో బ్రిటిష్‌ సైనికులు సహా నాటో దేశాల సైనికులు భారీ త్యాగాలు చేశారని, ఈ వ్యాఖ్యలు వారిని అవమానించినట్లేనని అన్నారు. ట్రంప్‌ క్షమాపణ చెప్పాలని డిమాండ్‌ చేశారు. బ్రిటన్‌ యువరాజు హ్యారీ కూడా స్పందిస్తూ, అఫ్గానిస్థాన్‌లో బ్రిటిష్‌ సైనికుల త్యాగాలను గౌరవించాల్సిన సమయం ఇదని వ్యాఖ్యానించారు. మరోవైపు ఐక్యరాజ్యసమితిపై కూడా ట్రంప్‌ వ్యాఖ్యలు చేశారు. గాజా శాంతి మండలితో కలిసి ఐరాస పనిచేస్తే ఆ సంస్థకు మేలు జరుగుతుందని తెలిపారు. ఇదే సమయంలో కెనడా ప్రధాని మార్క్‌ కార్నీ విమర్శల నేపథ్యంలో, కెనడాకు ఇచ్చిన గాజా శాంతి మండలి ఆహ్వానాన్ని ట్రంప్‌ వెనక్కి తీసుకున్నారు.