సిజేరియన్ ప్రసవాల్లో దేశంలోనే అగ్రస్థానంలో తెలంగాణ

నేషనల్ ఫ్యామిలీ హెల్త్ సర్వే తాజా నివేదికలో తెలంగాణలో ఆందోళన కలిగించే ఆరోగ్య పరిస్థితులు వెలుగులోకి వచ్చాయి. సిజేరియన్ ప్రసవాల్లో తెలంగాణ దేశంలోనే అగ్రస్థానంలో నిలిచింది. రాష్ట్రంలో సిజేరియన్ రేటు 62.2 శాతానికి చేరగా, దేశ సగటు 22.9 శాతంతో పోలిస్తే దాదాపు మూడు రెట్లు ఎక్కువగా ఉంది. ప్రభుత్వ ఆసుపత్రుల్లో ఈ రేటు 48.6 శాతంగా నమోదైంది. ఆంధ్రప్రదేశ్‌లో ఇది 52.2 శాతంగా ఉంది.

అలాగే మధుమేహం విషయంలో కూడా తెలంగాణ జాతీయ సగటును దాటింది. రాష్ట్రంలో పురుషుల్లో 28.2 శాతం, మహిళల్లో 24.2 శాతం మంది షుగర్‌తో బాధపడుతున్నారని సర్వే వెల్లడించింది. ఈ గణాంకాలు ఆరోగ్య రంగంపై మరింత దృష్టి పెట్టాల్సిన అవసరాన్ని సూచిస్తున్నాయని నిపుణులు అభిప్రాయపడుతున్నారు.