హీరోయిన్ త్రిషకు క్షమాపణలు చెప్పిన తమిళనాడు బీజేపీ చీఫ్ నైనార్ నాగేంద్రన్!

నటి త్రిషపై తమిళనాడు బీజేపీ అధ్యక్షుడు నైనార్ నాగేంద్రన్ చేసిన వ్యాఖ్యలు తీవ్ర వివాదానికి దారితీశాయి. రాజకీయ మరియు సినీ వర్గాల నుంచి తీవ్ర విమర్శలు వెల్లువెత్తడంతో నాగేంద్రన్ వెనక్కి తగ్గి త్రిషకు బహిరంగ క్షమాపణలు తెలిపారు. తన వ్యాఖ్యలపై విచారం వ్యక్తం చేస్తూ వాటిని వెనక్కి తీసుకుంటున్నట్లు ప్రకటించారు. ఉద్దేశపూర్వకంగా ఆ వ్యాఖ్యలు చేయలేదని ఆయన స్పష్టం చేశారు.

చెన్నై విమానాశ్రయంలో ‘తమిళగ వెట్రి కళగం’ అధినేత, హీరో విజయ్‌పై విమర్శలు చేస్తూ నాగేంద్రన్ వ్యక్తిగత వ్యాఖ్యలు చేయడం ఈ వివాదానికి కారణమైంది. వ్యక్తిగత విషయాలను రాజకీయాల్లోకి లాగడంపై అధికార డీఎంకే, టీవీకే నేతలు, విజయ్ అభిమానులు తీవ్ర ఆగ్రహం వ్యక్తం చేశారు. త్రిష కూడా స్పందిస్తూ తనకు రాజకీయాలతో సంబంధం లేదని, తన పేరును అనవసరంగా ఉపయోగిస్తే న్యాయపరమైన చర్యలు తీసుకుంటానని హెచ్చరించింది. పెరుగుతున్న విమర్శల నేపథ్యంలో నాగేంద్రన్ క్షమాపణలు చెప్పడంతో ఈ వివాదం ఎటు దారితీస్తుందో చూడాల్సి ఉంది.