తొలిసారి హైదరాబాద్ బయట తెలంగాణ కాబినెట్, జీవో జారీ

తెలంగాణ రాష్ట్ర చరిత్రలో అరుదైన నిర్ణయంగా, రాష్ట్ర మంత్రివర్గ సమావేశాన్ని ఈసారి రాజధాని హైదరాబాద్‌కు దూరంగా ములుగు జిల్లా మేడారంలో నిర్వహించనున్నారు. ఈ నెల 18 వ తేదీ ఆదివారం సాయంత్రం 5 గంటలకు మేడారంలోని హరిత హోటల్‌లో కేబినెట్ భేటీ జరగనుంది. సాధారణంగా సచివాలయంలో జరిగే సమావేశాన్ని గిరిజన ప్రాంతమైన మేడారంలో నిర్వహించాలని ప్రభుత్వం నిర్ణయించింది. ఈ మేరకు ప్రభుత్వ ప్రధాన కార్యదర్శి కే. రామకృష్ణారావు అధికారిక ఉత్తర్వులు జారీ చేశారు.

ఈ సమావేశంలో మేడారం సమ్మక్క–సారలమ్మ జాతర ఏర్పాట్లపై సమీక్షతో పాటు, గిరిజన ప్రాంతాల అభివృద్ధిపై కీలక నిర్ణయాలు తీసుకునే అవకాశం ఉంది. అదేవిధంగా రాష్ట్ర బడ్జెట్, మున్సిపల్ ఎన్నికలు, రైతు భరోసా వంటి ముఖ్య అంశాలపై కూడా చర్చ జరిగే సూచనలు ఉన్నాయి. ఈ కేబినెట్ భేటీకి డిప్యూటీ సీఎం మల్లు భట్టి విక్రమార్క, మంత్రులు, ఉన్నతాధికారులకు ఇప్పటికే సమాచారం అందగా, ములుగు జిల్లా కలెక్టర్ మరియు ఎస్పీకి అవసరమైన ఏర్పాట్లు చేయాలని ఆదేశాలు జారీ అయ్యాయి.