క్రికెట్ లో సత్తా చాటుతున్న సీనియర్ ఐపిఎస్ సీవీ ఆనంద్..

57 ఏళ్ల సీనియర్ ఐపీఎస్ అధికారి సీవీ ఆనంద్ తన అద్భుత ఫిట్‌నెస్‌తో అందరిని ఆశ్చర్యపరిచారు. హైదరాబాద్ క్రికెట్ అసోసియేషన్ (HCA) వన్డే లీగ్ క్వార్టర్ ఫైనల్‌లో ఓపెనర్‌గా బరిలోకి దిగిన ఆయన హాఫ్ సెంచరీ సాధించి యువతకు ఆదర్శంగా నిలిచారు. మ్యాచ్‌కు ముందు ఆయన వార్మప్, బ్యాటింగ్ ప్రాక్టీస్ నిర్వహించి గాయాలనుంచి రక్షణ కోసం సన్నద్ధత అవసరమని సూచించారు. తన ఫిట్‌నెస్ ట్రైనర్లు కార్తీక్, మహాదేవ్ తీసిన వీడియో, కోచ్ కార్తీక్ ఇన్‌స్టాగ్రామ్‌లో షేర్ చేసిన వెంటనే వైరల్ అయింది.

1991 బ్యాచ్ ఐపీఎస్ అధికారి, మాజీ హైదరాబాద్ పోలీస్ కమిషనర్ సీవీ ఆనంద్ వృత్తిపరమైన ఒత్తిడిని అధిగమించడానికి క్రీడలను జీవితంలో భాగంగా చేసుకున్నారు. క్రికెట్, టెన్నిస్, గోల్ఫ్, యోగా, ప్రాణాయామం వంటి వ్యాయామాల ద్వారా శారీరక, మానసిక శక్తిని నిలుపుతున్నారు. వైరల్ వీడియోలో ఆయన జాగింగ్, స్ట్రెచింగ్, ఆర్మ్ రొటేషన్స్ చేస్తున్నట్లుగా చూపించారు.ప్రతి ఆటకు ముందు శరీరాన్ని వార్మప్ చేయడం, ఆట తర్వాత స్ట్రెచింగ్ చేయడం ఎంతో ముఖ్యమని ఆయన చెప్పారు. సోషల్ మీడియాలో ఆయన ఫిట్‌నెస్ ప్రశంసలు పొందుతోంది. ప్రస్తుతం తెలంగాణ హోం శాఖ ప్రత్యేక ప్రధాన కార్యదర్శిగా ఉన్న ఆయన, ఉన్నత స్థాయిలో ఉండి కూడా ఫిట్‌నెస్ మరియు వర్క్-లైఫ్ బ్యాలెన్స్‌లో స్ఫూర్తిగా నిలుస్తున్నారు.