సమ్మర్ హాలిడేస్‌కి భారీగా స్పెషల్ ట్రైన్స్ - రైల్వే మంత్రి అశ్విని వైష్ణవ్

కేంద్ర రైల్వే మంత్రి అశ్విని వైష్ణవ్ 2026 వేసవి కాలంలో ప్రయాణికుల రద్దీపై అధికారులతో సమీక్షా సమావేశం నిర్వహించారు. పెరుగుతున్న డిమాండ్‌ను దృష్టిలో ఉంచుకుని ఇండియన్ రైల్వేస్ ఏప్రిల్ 15 నుండి జూలై 15 వరకు మొత్తం 18,262 వేసవి ప్రత్యేక రైలు ట్రిప్పులను నడపాలని నిర్ణయించింది. ఇప్పటికే 11,878 ట్రిప్పులు ప్రకటించగా, మిగిలినవి త్వరలో ప్రకటించనున్నారు.

ప్రధాన నగరాలు అయిన న్యూఢిల్లీ, ముంబై, సూరత్, అహ్మదాబాద్, బెంగళూరులో ప్రత్యేక ఏర్పాట్లు చేశారు. ప్లాట్‌ఫారమ్‌లపై రద్దీ నియంత్రణ కోసం రియల్ టైమ్ మానిటరింగ్, రైల్వే రక్షణ దళం సిబ్బంది వినియోగం, సురక్షితమైన బోర్డింగ్ చర్యలు అమలు చేస్తున్నారు. అలాగే దక్షిణ మధ్య రైల్వే పరిధిలో సుమారు 1,184 ట్రిప్పులు నడపనున్నారు. వేసవిలో స్వగ్రామాలకు వెళ్లే ప్రయాణికులకు సురక్షితమైన, సౌకర్యవంతమైన ప్రయాణం కల్పించడం ప్రధాన లక్ష్యమని అధికారులు తెలిపారు.