శివరాత్రి రోజున గంజాయి ప్రసాదం.. శంషాబాద్‌లో యువకుల రీల్‌పై పోలీసుల కఠిన హెచ్చరిక

హైదరాబాద్‌లోని శంషాబాద్ ప్రాంతంలో ఉన్న ధర్మగిరి దేవాలయం వద్ద గంజాయి వ్యవహారం కలకలం రేపింది. శివరాత్రి సందర్భంగా కొందరు యువకులు శివుడికి గంజాయిని ప్రసాదంగా పెట్టారు. అంతేకాకుండా ఆ ఘటనను వీడియోగా తీసి ఇన్‌స్టాలో రీల్‌గా పోస్ట్ చేశారు. ఆ వీడియో సామాజిక మాధ్యమాల్లో వైరల్ కావడంతో నెటిజన్లు పోలీసులకు ఫిర్యాదు చేశారు.

ఫిర్యాదుల ఆధారంగా పోలీసులు విచారణ చేపట్టగా, ఈ ఘటనకు సంబంధించిన యువకులు బడంగ్‌పేట ప్రాంతానికి చెందినవారని గుర్తించారు. మతపరమైన స్థలాల్లో ఇలాంటి చర్యలు చేయడం సరైంది కాదని పోలీసులు తెలిపారు.

ఈ విషయంపై నగర పోలీసు కమిషనర్ కఠినంగా స్పందించారు. ఇలాంటి రీల్స్ తీసి సోషల్ మీడియాలో పోస్ట్ చేసే వారిపై కఠిన చర్యలు తీసుకుంటామని హెచ్చరించారు. చట్టాన్ని గౌరవించాలని, ప్రజలు బాధ్యతగా ప్రవర్తించాలని సూచించారు.