భారీ విజయంతో ఎగసిన ఇస్రో బాహుబలి రాకెట్

భారత అంతరిక్ష పరిశోధనా సంస్థ (ఇస్రో) మరో చరిత్ర సృష్టించింది. భారత భూమి నుంచి ఇప్పటివరకు అత్యంత బరువైన కమ్యూనికేషన్ ఉపగ్రహాన్ని విజయవంతంగా ప్రయోగించి, కక్ష్యలో ప్రవేశపెట్టింది.

4,410 కిలోల బరువున్న ఈ ఉపగ్రహాన్ని ఆంధ్రప్రదేశ్‌లోని శ్రీహరికోట సతీశ్ ధావన్ స్పేస్ సెంటర్‌ నుంచి ఎల్‌వీఎం3-ఎం5 బాహుబలి రాకెట్ ద్వారా అంతరిక్షంలోకి పంపారు. ఈ రాకెట్ ఉపగ్రహాన్ని విజయవంతంగా జియోసింక్రనస్ ట్రాన్స్‌ఫర్ ఆర్బిట్‌లో ఉంచింది.

సీఎంఎస్-03 పేరుతో రూపొందించిన ఈ మల్టీ-బ్యాండ్ కమ్యూనికేషన్ ఉపగ్రహం భారత భూభాగం సహా విస్తృత సముద్ర ప్రాంతాల్లో సేవలు అందిస్తుంది. ఇది 2013లో ప్రయోగించిన జీఎస్ఏటీ-7 సిరీస్‌కు ప్రత్యామ్నాయంగా పనిచేస్తుంది మరియు వచ్చే 15 సంవత్సరాలపాటు సేవలు అందించనుంది.

ఈ విజయవంతమైన ప్రయోగం ప్రధాని నరేంద్ర మోదీ ప్రకటించిన ఆత్మనిర్భర్ భారత్ లక్ష్యానికి మరో గొప్ప ఉదాహరణగా నిలిచింది. అనుకూలం కాని వాతావరణ పరిస్థితుల మధ్య కూడా శాస్త్రవేత్తలు ఎలాంటి అంతరాయం లేకుండా రాకెట్‌ను సక్సెస్‌ఫుల్‌గా ప్రయోగించారు. ఇస్రో చైర్మన్ వి. నారాయణన్ ఈ విజయానికి వెనుక ఉన్న బృందాన్ని అభినందించారు.

ఇక దర్శకుడు ఎస్‌.ఎస్‌. రాజమౌళి ఇస్రో విజయంపై ఆనందం వ్యక్తం చేశారు. “బరువైన మరియు శక్తివంతమైన రాకెట్‌కు బాహుబలి అనే పేరు రావడం మాకు గర్వకారణం” అని తెలిపారు.