తిరుమల శ్రీవారి ని దర్శించుకున్న ఇస్రో చైర్మన్

భారత అంతరిక్ష పరిశోధనా సంస్థ Indian Space Research Organisation చైర్మన్ డా. వి. నారాయణన్ ఇవాళ తిరుమలలో శ్రీ వెంకటేశ్వర స్వామి ఆలయం ను దర్శించుకున్నారు. కీలక అంతరిక్ష ప్రయోగాలకు ముందు శ్రీవారి ఆశీస్సులు కోరుకోవడం ఇస్రోలో సంప్రదాయంగా కొనసాగుతోంది. ఈ నేపథ్యంలో డిసెంబర్ 24 న జరగనున్న ప్రధాన లాంచ్ విజయవంతం కావాలని ప్రార్థించినట్లు సమాచారం.

ఈ నెల 24 వ తేదీ ఉదయం 8:54 గంటలకు శ్రీహరికోట నుంచి బాహుబలి రాకెట్ LVM3-M6 ద్వారా అమెరికాకు చెందిన AST SpaceMobile సంస్థ రూపొందించిన బ్లూబర్డ్ బ్లాక్-2 కమ్యూనికేషన్ ఉపగ్రహాన్ని నింగిలోకి ప్రవేశపెట్టనున్నారు.

ఈ ఉపగ్రహం భారత్ నుంచి ఇప్పటివరకు లో ఎర్త్ ఆర్బిట్ (LEO) లోకి పంపనున్న అత్యంత బరువైన వాణిజ్య కమ్యూనికేషన్ ఉపగ్రహంగా రికార్డు సృష్టించనుంది. దాదాపు 223 చదరపు మీటర్ల విస్తీర్ణం కలిగిన భారీ ఫేజ్‌డ్ అరే ఆంటెన్నాతో ఇది రూపొందించబడింది.

ఈ ఉపగ్రహం ద్వారా ప్రపంచవ్యాప్తంగా సాధారణ స్మార్ట్‌ఫోన్లకే నేరుగా 4జీ, 5జీ సిగ్నల్స్ అందించనున్నారు. దీని వలన దూర ప్రాంతాలు, సముద్రాలు, ఎడారులు వంటి నెట్‌వర్క్ లేని ప్రాంతాల్లో కూడా హైస్పీడ్ ఇంటర్నెట్, వాయిస్ కాల్స్, వీడియో స్ట్రీమింగ్ సౌకర్యాలు అందుబాటులోకి రానున్నాయి. ఈ ప్రయోగం భారత అంతరిక్ష రంగానికి మరో కీలక మైలురాయిగా నిపుణులు అభిప్రాయపడుతున్నారు.