తెలంగాణలో వడగళ్ల వాన బీభత్సం...రైతుల తీవ్ర ఆందోళన

తెలంగాణ రాష్ట్రంలోని జయశంకర్ భూపాలపల్లి జిల్లా, సిద్దిపేట జిల్లా, నిర్మల్ జిల్లా ప్రాంతాల్లో అకస్మాత్తుగా ఈదురు గాలులు, వడగళ్లతో కూడిన భారీ వర్షం కురిసింది. ఒక్కసారిగా మారిన వాతావరణంతో ప్రజలు ఆశ్చర్యానికి గురయ్యారు. పలుచోట్ల రహదారులు జలమయమై రాకపోకలకు అంతరాయం కలిగింది.

ప్రత్యేకంగా కాళేశ్వరం ప్రాంతంలో వడగళ్ల వాన తీవ్రంగా కురిసి బీభత్సం సృష్టించింది. భారీ గాలుల కారణంగా విద్యుత్ స్తంభాలు విరిగిపడగా, విద్యుత్ వైర్లు తెగిపోవడంతో సరఫరా నిలిచిపోయింది. చెట్లు కూలిపోవడం వంటి ఘటనలు చోటుచేసుకుని స్థానికులు ఇబ్బందులు ఎదుర్కొన్నారు.

ఈ వర్షాలతో మిర్చి, పత్తి, కూరగాయలు తదితర వాణిజ్య పంటలకు భారీ నష్టం వాటిల్లింది. ఇప్పటికే పెట్టుబడులు పెట్టిన రైతులు తీవ్ర ఆందోళనకు గురయ్యారు. అధికారులు నష్టాలను అంచనా వేయడానికి క్షేత్రస్థాయిలో పరిశీలనలు చేపట్టి, విద్యుత్ సరఫరా పునరుద్ధరణకు చర్యలు ప్రారంభించారు.