తెలంగాణ రైజింగ్ గ్లోబల్ సమ్మిట్ ను ప్రారంభించిన గవర్నర్ జిష్ణు దేవ్ వర్మ

తెలంగాణ రైజింగ్ గ్లోబల్ సమ్మిట్-2025ను హైదరాబాద్ శివారులోని భారత్ ఫ్యూచర్ సిటీలో గవర్నర్ జిష్ణు దేవ్ వర్మ ప్రారంభించారు. ఈ రెండు రోజుల సమ్మిట్‌లో ముఖ్యమంత్రి రేవంత్ రెడ్డి, డెప్యూటీ సీఎం మల్లు భట్టి విక్రమార్క, మంత్రులు, కేంద్ర మంత్రి కిషన్ రెడ్డి, దేశీ, విదేశీ పారిశ్రామిక నాయకులు పాల్గొన్నారు. 44 దేశాల నుంచి 2,000 మంది గెస్ట్‌లు, 154 మంది ప్రతినిధులు హాజరయ్యారు. పెట్టుబడులు, యువతకు ఉపాధి అవకాశాలు, 27 అంశాలపై సెషన్లు లక్ష్యంగా ఈ సమ్మిట్ జరిగింది. గవర్నర్ జిష్ణు దేవ్ వర్మ మాట్లాడుతూ, ఈ సమ్మిట్ ప్రారంభం సంతోషకరమని, 2047 నాటికి తెలంగాణ మూడు ట్రిలియన్ డాలర్ ఆర్థిక వ్యవస్థకు చేరుకోవాలని ఆశాభావం వ్యక్తం చేశారు. రేవంత్ రెడ్డి నాయకత్వంలో రాష్ట్రం అన్ని రంగాల్లో అభివృద్ధి సాధిస్తోందని ప్రశంసించారు.

యువ ముఖ్యమంత్రి రేవంత్ రెడ్డి అద్భుతాలు చేస్తున్నారని, 20 లక్షల మంది రైతుల రుణాల మాఫీ, మహిళలు, బాలికలకు ఉచిత ప్రయాణ సౌకర్యం కల్పించడం, విద్యా ప్రమాణాల పెంపు కోసం కృషి చేయడం వంటి కార్యక్రమాలు ప్రజలకు మేలు చేస్తున్నాయని గవర్నర్ జిష్ణు దేవ్ వర్మ అన్నారు. నోబెల్ బహుమతి విజేత కైలాష్ సత్యార్థి కూడా ముఖ్యమంత్రి కృషిని ప్రశంసించారు. ఈ సమ్మిట్ ద్వారా తెలంగాణ భవిష్యత్ ఆర్థిక ప్రగతికి కీలకమవుతుందని, ఇది డేవోస్ లాంటి ప్రపంచ స్థాయి ఫోరమ్‌గా మారాలని అందరూ ఆశిస్తున్నారు.