రాష్ట్రవ్యాప్తంగా పాఠశాలలకు సంక్రాంతి సెలవులు ప్రకటించిన ప్రభుత్వం

రాష్ట్రంలోని అన్ని పాఠశాలలకు ప్రభుత్వం సంక్రాంతి సెలవులను ప్రకటించింది. ఈ నెల 10 నుంచి 16 వరకు సెలవులు అమల్లో ఉంటాయని స్కూల్ ఎడ్యుకేషన్ డైరెక్టర్ నవీన్ నికోలస్ ఉత్తర్వులు జారీ చేశారు. ప్రభుత్వం విడుదల చేసిన సెలవుల క్యాలెండర్ ప్రకారం ఈ నెల 15 న సంక్రాంతి పండుగ, ఈ నెల 16 న కనుమను ఆప్షనల్ హాలిడేగా పేర్కొన్నారు.

సెలవుల అనంతరం రాష్ట్రంలోని అన్ని యాజమాన్యాల పాఠశాలలు ఈ నెల 17 న తిరిగి ప్రారంభమవుతాయని తెలిపారు. ఈ నిర్ణయానికి అనుగుణంగా అవసరమైన చర్యలు చేపట్టాలని హైదరాబాద్, వరంగల్ ప్రాంతీయ డైరెక్టర్లతో పాటు రాష్ట్రంలోని అన్ని జిల్లాల విద్యాశాఖ అధికారులకు ఆదేశాలు జారీ చేశారు. ఈ నిర్ణయం 2025–26 విద్యా సంవత్సరం క్యాలెండర్ ప్రకారం తీసుకున్నట్లు ప్రభుత్వం స్పష్టం చేసింది.