జైళ్లలో మత్తు విముక్తి కేంద్రాల ఏర్పాటు ప్రశంసనీయం- గవర్నర్ శుక్ల

తెలంగాణ గవర్నర్ శివప్రతాప్ శుక్ల సోమవారం చెర్లపల్లి సెంట్రల్ జైలులో “నివృత్తి” మత్తు విముక్తి కేంద్రాన్ని ప్రారంభించారు. జైళ్లలో మత్తు విముక్తి కేంద్రాలు ఏర్పాటు చేయడం ప్రశంసనీయమని గవర్నర్ పేర్కొన్నారు. మత్తు పదార్థాల దుర్వినియోగం తీవ్రమైన సామాజిక, ప్రజారోగ్య సమస్యగా మారిందని, దీన్ని సమగ్రంగా ఎదుర్కోవాల్సిన అవసరం ఉందని అన్నారు. రాజకీయ జీవితంలో అనుభవించిన జైలు కాలం ద్వారా ఖైదీలు, జైలు సిబ్బంది ఎదుర్కొనే సమస్యలను అర్థం చేసుకున్నానని తెలిపారు. ఫ్యాన్లు, టీవీలు వంటి సౌకర్యాలు కల్పించడం, కానిస్టేబుళ్లకు వార్డర్ల సమాన వేతనాలు ఇవ్వడం వంటి చర్యలను గుర్తుచేశారు.

గవర్నర్ నశా ముక్త భారత్ కార్యక్రమం కింద రాష్ట్ర ప్రభుత్వం చేపడుతున్న మత్తు నిర్మూలన చర్యలను ప్రశంసించారు. ముఖ్యంగా డా. సౌమ్య మిశ్రా నాయకత్వంలో జైళ్లలో మత్తు విముక్తి కేంద్రాల ఏర్పాటు వినూత్నమైనదని గుర్తించారు. మత్తు వ్యసనాన్ని శిక్షాత్మక అంశంగా కాకుండా ప్రజారోగ్య సమస్యగా పరిగణించి వైద్య చికిత్స, కౌన్సెలింగ్, పునరావాసం ద్వారా పరిష్కరించాల్సిన అవసరాన్ని వివరించారు. చంచల్ గూడ, చెర్లపల్లి, సంగారెడ్డి, నిజామాబాద్ సెంట్రల్ జైళ్లు, హైదరాబాద్ మహిళా ప్రత్యేక జైలులో నివృత్తి కేంద్రాలు ఏర్పాటు చేయబడ్డాయి. ఇప్పటివరకు 2,915 మంది ఖైదీలు స్క్రీనింగ్ చేయబడ్డారు, 590 మంది హెచ్‌ఓ-అసిస్ట్ ప్రమాణాల ప్రకారం కౌన్సెలింగ్, చికిత్స పొందారు.

ప్రారంభోత్సవం తర్వాత గవర్నర్ చెర్లపల్లి ప్రిజన్ అగ్రికల్చరల్ కాలనీని సందర్శించి ఖైదీలతో మాట్లాడారు, వ్యవసాయ మరియు వృత్తిపర కార్యక్రమాలను పరిశీలించారు. పబ్లిక్-ప్రైవేట్ భాగస్వామ్యంతో ఏర్పాటు చేసిన “ఏరియా 77” నేచర్ క్యాంప్, అడ్వెంచర్ పార్క్ ను సందర్శించి సైపా వ్యవసాయం, తేనేటీగల పెంపకం, ఇతర జీవనోపాధి కార్యక్రమాల ద్వారా ఖైదీల నైపుణ్యాభివృద్ధి, క్రమశిక్షణ, బాధ్యత పెంపొందించడాన్ని ప్రశంసించారు.