పొద్దుతిరుగుడు నూనెకు డిమాండ్ తగ్గుదల.. 2026-27 లో విక్రయాలు 10% పడిపోవచ్చు

పశ్చిమాసియాలో కొనసాగుతున్న ఉద్రిక్త పరిస్థితుల ప్రభావంతో భారత్‌లో శుద్ధి చేసిన పొద్దుతిరుగుడు నూనె (సన్‌ఫ్లవర్ ఆయిల్) విక్రయాలు 2026-27 ఆర్థిక సంవత్సరంలో సుమారు 10 శాతం తగ్గే అవకాశం ఉందని క్రిసిల్ రేటింగ్స్ అంచనా వేసింది. సరఫరాలో అంతరాయాలు ఏర్పడటం, అలాగే ధరలు పెరగడం వల్ల వినియోగదారులు చౌకైన ప్రత్యామ్నాయ నూనెల వైపు మళ్లుతున్నారని నివేదిక తెలిపింది.

భారత్‌లో సంవత్సరానికి సుమారు 25 నుంచి 26 మిలియన్ టన్నుల వంట నూనెల వినియోగం ఉంది. ఇందులో పొద్దుతిరుగుడు నూనె వాటా 12 నుంచి 14 శాతం వరకు ఉంటుంది. ఈ నూనె ప్రధానంగా రష్యా, ఉక్రెయిన్, అర్జెంటీనా దేశాల నుంచి దిగుమతి అవుతుంది. పశ్చిమాసియా ఉద్రిక్తతలకు ముందు ముడి పొద్దుతిరుగుడు నూనె సగటు దిగుమతి ధర టన్నుకు 1,275 డాలర్లుగా ఉండేది. ప్రస్తుతం అది 1,420 నుంచి 1,440 డాలర్ల మధ్యకు పెరిగింది. డాలర్‌తో పోలిస్తే రూపాయి బలహీనపడటం, రవాణా ఖర్చులు పెరగడం వల్ల దిగుమతి వ్యయం మరింత పెరిగింది.

దీని ప్రభావంగా దేశీయంగా నూనె ధరలు పెరిగాయి. 2026 జనవరిలో లీటరు రూ.150 గా ఉన్న పొద్దుతిరుగుడు నూనె ధర ఇప్పుడు రూ.170 నుంచి రూ.175 వరకు చేరింది. ఇదే సమయంలో బియ్యపు తవుడు నూనె, సోయాబీన్ నూనె లీటరుకు రూ.10 నుంచి రూ.20 వరకు తక్కువ ధరకు లభిస్తున్నాయి. అందువల్ల వినియోగదారులు ఈ ప్రత్యామ్నాయాల వైపు మొగ్గు చూపుతున్నారు.