మేడారంలో సమ్మక్క వనప్రవేశం.. భావోద్వేగంగా సాగిన చివరి పూజలు

మేడారంలో మూడు రోజుల పాటు భక్తుల పూజలు అందుకున్న సమ్మక్క తల్లి శనివారం రాత్రి వనప్రవేశం చేశారు. గద్దె పై నుంచి అమ్మను అరణ్యానికి సాగనంపే ఈ కార్యక్రమం భక్తుల జయజయధ్వానాల మధ్య ఉద్వేగభరితంగా జరిగింది. గిరిజన సంప్రదాయ వాయిద్యాల మోగింపులు, కొమ్ముబూరల శబ్దాల నడుమ భక్తులు నృత్యాలు చేస్తూ అమ్మకు వీడ్కోలు పలికారు. శివసత్తులు పూనకాలతో ఉత్సాహంగా ఊగిపోయారు.

సమ్మక్కతో పాటు గద్దెల పై పూజలందుకున్న సారలమ్మ, పగిడిద్దరాజు, గోవిందరాజులను ఆయా గొట్ల పూజారులు తమ ప్రాంతాల్లోని ఆలయాలకు తీసుకెళ్లారు. సమ్మక్కను గద్దె నుంచి చిలకలగుట్టకు చేర్చే వరకు ఆదివాసీ పూజారులు ముందుండగా, భక్తులు దారిపొడవునా వెంట నడిచారు. ఈ వనప్రవేశ వేడుకలో మంత్రి సీతక్కతో పాటు జిల్లా స్థాయి ఉన్నతాధికారులు పాల్గొన్నారు.

ఇక సారలమ్మను రాత్రి సమయంలో కన్నెపల్లికి, గోవిందరాజును ఏటూరునాగారం మండలం కొండాయికి తరలించారు. పగిడిద్దరాజు రాత్రే బయలుదేరగా, మహబూబాబాద్ జిల్లా గంగారం మండలం పూనుగొండ్ల ఆలయంలోకి ఆదివారం ఉదయం ప్రవేశం చేయించనున్నారు.

శనివారం ఉదయం నాటికి జాతర ప్రాంగణంలో రద్దీ కొంత మేర తగ్గినప్పటికీ, వివిధ ప్రాంతాల నుంచి వచ్చిన వాహనాలు ట్రాఫిక్‌లో చిక్కుకోవడంతో పరిస్థితి మళ్లీ ఉద్రిక్తంగా మారింది. శుక్రవారం రాత్రి నుంచి శనివారం మధ్యాహ్నం వరకు మేడారం–తాడ్వాయి, తాడ్వాయి–పస్రా మార్గాల్లో వందల సంఖ్యలో బస్సులు నిలిచిపోయాయి. హైదరాబాద్‌ వైపు వెళ్లాల్సిన వాహనాలు ఉదయం వరకు చేరలేకపోయాయి.

హనుమకొండ నుంచి మేడారానికి సాధారణంగా మూడు గంటల్లో చేరాల్సిన ప్రయాణం, ఈసారి పది గంటల వరకు సాగింది. తీవ్ర ఆలస్యంతో అసహనానికి గురైన కొందరు ప్రయాణికులు ములుగు సమీపంలో ఒక ఆర్టీసీ బస్సు అద్దాలను ధ్వంసం చేశారు. ట్రాఫిక్ నియంత్రణకు రోడ్ల విస్తరణ, సాంకేతిక వినియోగం వంటి చర్యలు చేపట్టామని అధికారులు చెప్పినా, శనివారం మధ్యాహ్నం వరకూ సమస్య పూర్తిగా పరిష్కారం కాలేదు.

మేడారంలోని గద్దెల ప్రాంగణం, క్యూలైన్లు విస్తరించామని, ఈసారి తోపులాటలు ఉండవని ముందుగానే అధికారులు ప్రకటించారు. అయితే వాస్తవ పరిస్థితి భిన్నంగా కనిపించింది. గద్దెల ప్రాంగణానికి వెళ్లే మార్గాల్లో ఏర్పాటు చేసిన కొన్ని గేట్లు అవసరమైన సమయంలో తెరవకపోవడంతో తోపులాటలు జరిగి కొందరు భక్తులు గాయపడ్డారు. ఉన్నతాధికారుల పర్యవేక్షణ ఉన్నప్పటికీ, కిందిస్థాయి సిబ్బంది సమన్వయం లోపించిందనే విమర్శలు వినిపిస్తున్నాయి.