జెఫ్రీ ఎప్‌స్టీన్ ను తాను ఎన్నడూ కలవలేదన్న దలైలామా

ప్రపంచవ్యాప్తంగా చర్చకు దారితీసిన జెఫ్రీ ఎప్‌స్టీన్ ఫైల్స్‌లో బౌద్ధ మత గురువు దలైలామా పేరు పలుమార్లు ప్రస్తావనకు రావడం ఇటీవల వివాదంగా మారింది. అమెరికా న్యాయ శాఖ విడుదల చేసిన ఈ పత్రాల్లో దలైలామా పేరు మొత్తం 169 చోట్ల కనిపించడంతో అనేక అనుమానాలు వ్యక్తమయ్యాయి. ఈ నేపథ్యంలో, తనపై వస్తున్న ఆరోపణలకు దలైలామా తాజాగా స్పందించారు.

ఎక్స్ (X) వేదికగా మీడియాకు విడుదల చేసిన ప్రకటనలో, మహిళలు మరియు మైనర్లపై లైంగిక నేరాలకు పాల్పడ్డ నిందితుడు జెఫ్రీ ఎప్‌స్టీన్‌ను తాను ఎన్నడూ కలవలేదని స్పష్టం చేశారు. ఎప్‌స్టీన్ ఫైల్స్‌లో తన పేరు ప్రస్తావన పూర్తిగా నిరాధారమని, ఎప్‌స్టీన్‌తో గానీ ఆయన ప్రతినిధులతో గానీ తాను ఎలాంటి సమావేశాలు జరపలేదని తెలిపారు.

ఇటీవల కొన్ని పత్రికలు, సోషల్ మీడియాలో దలైలామా జెఫ్రీ ఎప్‌స్టీన్‌తో కలిసినట్టు వచ్చిన కథనాలపై దలైలామా కార్యాలయం తీవ్ర అభ్యంతరం వ్యక్తం చేసింది. తనపై అసత్య ప్రచారం జరుగుతోందని పేర్కొంటూ, ఇలాంటి తప్పుడు వార్తలను ప్రజలు నమ్మవద్దని విజ్ఞప్తి చేసింది.