వేగంగా ముందుకు సాగుతున్న వాయుగుండం… ఈ జిల్లాల్లో భారీ వర్షాల హెచ్చరిక

నైరుతి బంగాళాఖాతంలో ఏర్పడిన వాయుగుండం మరింతగా కదలిక చూపుతోంది. మంగళవారం సాయంత్రం నుంచి ఇది ఉత్తర తమిళనాడు, పుదుచ్చేరి, దక్షిణ ఆంధ్రప్రదేశ్ తీరాల దిశగా గంటకు 3 కిలోమీటర్ల నెమ్మదైన వేగంతో ముందుకు సాగుతోంది. అమరావతి వాతావరణ కేంద్రం తెలిపిన వివరాల ప్రకారం, ఈ వాయుగుండం చెన్నైకి తూర్పు–ఆగ్నేయ దిశలో సుమారు 40 కిలోమీటర్ల దూరంలో, పుదుచ్చేరికి ఈశాన్యంగా 120 కిలోమీటర్ల దూరంలో, నెల్లూరుకు దక్షిణ–ఆగ్నేయంగా 190 కిలోమీటర్ల దూరంలో కేంద్రీకృతమై ఉంది.

వాతావరణ శాస్త్రజ్ఞులు అంచనా వేసినట్లుగా, వాయుగుండం ప్రభావం వచ్చే 12 గంటల పాటు కొనసాగి, తదుపరి 12 గంటల్లో ఇది అల్పపీడనంగా బలహీనపడే అవకాశం ఉంది. ప్రస్తుతం ఈ వాయుగుండం ఉత్తర తమిళనాడు–పుదుచ్చేరి తీరాలకు కేవలం 25 కిలోమీటర్ల దూరంలో ఉందని అధికారులు వెల్లడించారు.

దీని ప్రభావంతో బుధవారం నెల్లూరు, తిరుపతి జిల్లాల్లో మోస్తరు నుంచి భారీ వర్షాలు పడే అవకాశం ఉంది. కృష్ణా, ఎన్టీఆర్, గుంటూరు, బాపట్ల, ప్రకాశం, రాయలసీమ జిల్లాల్లో తేలికపాటి నుంచి మోస్తరు వర్షాలు నమోదయ్యే అవకాశం ఉందని వాతావరణ విభాగం సూచించింది.