మొంథా తుఫాన్‌ బీభత్సం – ఏపీలో రూ.5,265 కోట్ల నష్టం: సీఎం చంద్రబాబు

ఇటీవల ఆంధ్రప్రదేశ్‌ తీరాన్ని తాకిన మొంథా తుఫాన్‌ భారీ నష్టం కలిగించింది. రాష్ట్రవ్యాప్తంగా సుమారు రూ.5,265 కోట్ల నష్టం జరిగినట్టు ముఖ్యమంత్రి నారా చంద్రబాబు నాయుడు ప్రకటించారు. అమరావతిలో మీడియా సమావేశంలో మాట్లాడిన సీఎం, వివిధ శాఖల్లో తుఫాన్‌ వల్ల జరిగిన నష్టాల వివరాలు వెల్లడించారు. రోడ్లు & భవనాల శాఖకు అత్యధికంగా రూ.2,079 కోట్ల నష్టం సంభవించిందని తెలిపారు.  వ్యవసాయ రంగంలో రూ.829 కోట్లు, హార్టికల్చర్‌లో రూ.40 కోట్లు, సీరికల్చర్‌ (పట్టు ఉత్పత్తి)లో రూ.65 లక్షల నష్టం నమోదైందన్నారు. మత్స్యరంగం తీవ్రంగా దెబ్బతిందని, దాదాపు రూ.1,270 కోట్ల నష్టం జరిగిందని వివరించారు. అదనంగా,

మున్సిపల్ శాఖ – రూ.109 కోట్లు

నీటివనరుల శాఖ – రూ.207 కోట్లు

గ్రామీణ జలసరఫరా శాఖ – రూ.1.2 కోట్లు

పంచాయతీ రాజ్ శాఖ – రూ.9 కోట్లు

మహిళా & శిశు సంక్షేమ శాఖ – రూ.1.52 కోట్లు నష్టం ఎదుర్కొన్నాయి.

చంద్రబాబు నాయుడు తెలిపారు తుఫాన్‌ కారణంగా అనేక రహదారులు చెదిరిపోయాయని, గుంటలు ఏర్పడ్డాయని. ఈ నష్టాలపై కేంద్ర ప్రభుత్వానికి పూర్తి నివేదిక సమర్పిస్తామని, అవసరమైతే అప్‌డేట్‌ చేయనున్నట్టు తెలిపారు.

గత 16 నెలల్లో రాష్ట్ర ప్రభుత్వం డేటా ఆధారిత టెక్నాలజీ వ్యవస్థను అభివృద్ధి చేసిందని, తుఫాన్‌ల అంచనా మరియు నష్టాల అంచనా వేయడంలో ఇది ఎంతో ఉపయోగపడిందని చెప్పారు. తుఫాన్‌ ప్రభావం నెల్లూరు, బాపట్ల, ప్రకాశం జిల్లాల్లో ఎక్కువగా కనిపించిందని, ల్యాండ్‌ఫాల్‌ కాకినాడ వద్ద జరగకపోయి కోనసీమ జిల్లా అంతర్వేది సమీపంలో తీరాన్ని తాకిందని వెల్లడించారు. అతివృష్టి కారణంగా రాష్ట్రంలోని ప్రధాన జలాశయాలు 90 శాతం మేర నిండిపోయాయని, మొత్తం 98.5 టీఎంసీ నీరు నిల్వ ఉన్నట్టు తెలిపారు.