సమ్మక్క–సారలమ్మ ఆలయాన్ని సందర్శించిన బ్రిటిష్ డిప్యూటీ కమిషనర్

బ్రిటిష్ డిప్యూటీ హై కమిషనర్ గ్యారత్ వెన్ ఓవెన్ మేడారం మహా జాతరకు హాజరై శ్రీ సమ్మక్క–సారలమ్మ ఆలయాన్ని దర్శించుకున్నారు. ఈ సందర్భంగా ఆయన తులాభారం కార్యక్రమంలో పాల్గొని అమ్మవార్లకు మొక్కులు చెల్లించారు. సంప్రదాయ హ్యాండ్లూమ్ వస్త్రధారణలో ఆయన ఆలయానికి రావడం భక్తులు, అధికారులను విశేషంగా ఆకట్టుకుంది. ప్రపంచ ప్రసిద్ధిగాంచిన మేడారం జాతరను ప్రత్యక్షంగా వీక్షించడం తనకు ప్రత్యేక అనుభూతిని ఇచ్చిందని ఆయన పేర్కొన్నారు.

మేడారం మహా జాతర ప్రాధాన్యత, నూతనంగా నిర్మించిన గద్దెలు, ఆదివాసీ సంప్రదాయాలు, భక్తులకు కల్పించిన సౌకర్యాలపై మంత్రి సీతక్క, జిల్లా కలెక్టర్ టి.ఎస్. దివాకర్ బ్రిటిష్ డిప్యూటీ హై కమిషనర్‌కు వివరించారు. జాతర ఏర్పాట్లు, భక్తుల సందడి, ఆధ్యాత్మిక వాతావరణాన్ని ఆయన ఎంతో ఆసక్తిగా తిలకించారు. మేడారం జాతర ప్రపంచ స్థాయిలో గుర్తింపు పొందాల్సిన విశిష్ట ఆదివాసీ ఉత్సవమని ఆయన ప్రశంసించారు.