అబ్బాస్ అరాగ్చీ రష్యా పర్యటన.. పుతిన్‌తో కీలక భేటీ

ఇరాన్ విదేశాంగ మంత్రి అబ్బాస్ అరాగ్చీ రష్యాలో పర్యటించనున్నారు. ఈ సందర్భంగా ఆయన రష్యా అధ్యక్షుడు వ్లాదిమిర్ పుతిన్‌తో సమావేశం కానున్నారు. రష్యా ప్రభుత్వ మీడియా ప్రకారం ఈ భేటీ ఈ రోజు మాస్కోలో జరగనుంది. పశ్చిమాసియాలో కొనసాగుతున్న ఉద్రిక్త పరిస్థితుల నేపథ్యంలో ఈ రష్యా–ఇరాన్ సమావేశానికి ప్రత్యేక ప్రాధాన్యం లభిస్తోంది.

క్రెమ్లిన్ ప్రతినిధి దిమిత్రి పెస్కోవ్ తెలిపిన వివరాల ప్రకారం, అధ్యక్షుడు పుతిన్ ఈ సమావేశానికి సిద్ధమవుతున్నారు. అయితే సమావేశ అజెండాకు సంబంధించిన పూర్తి వివరాలు ఇంకా వెల్లడించలేదు. మరోవైపు రష్యాలోని ఇరాన్ రాయబారి కజేమ్ జలాలీ మాట్లాడుతూ, ఈ భేటీలో అమెరికాతో తాజా చర్చల పరిస్థితి, కాల్పుల విరమణ అంశాలు అలాగే ప్రాంతీయ పరిణామాలపై చర్చలు జరగనున్నాయని తెలిపారు. ఇరాన్ విదేశాంగ శాఖ ప్రకారం, అబ్బాస్ అరాగ్చీ ఇప్పటికే ఇస్లామాబాద్ నుంచి రష్యాకు బయలుదేరారు.